Presidenti Bajram Begaj zhvilloi këtë të premte një vizitë në bashkinë e Vaut të Dejës, ku takoi disa sipërmarrës që kanë vendosur t’i investojnë të ardhurat e tyre në këtë bashki.
Kreu i shtetit vlerësoi se modelet e biznesit familjar po shndërrohen në sipërmarrje të mëdha, falë rikthimit nga emigracioni të banorëve të kësaj zone. “Shqipëria ka nevojë dhe i ka mundësitë sot, që të investohet këtu”, u shpreh ai.
Presidenti Begaj zhvilloi takime me autoritetet lokale dhe sipërmarrës të zonës me të cilët bisedoi për projektet dhe zhvillimin që po i jep kësaj zone investimi në ngritjen e fermave blegtorale, agroturizmin dhe artizanatin.
Presidenti vlerësoi rikthimin nga emigracioni të banorëve të kësaj zone dhe investimin e kursimeve të tyre për hapjen e bizneseve që ndikojnë në rritjen e mirëqëniez ekonomike në këtë bashki. Presidenti Begaj vizitoi fermën blegtorale të familjes Gjondrekaj, në Bushat, e cila me investimin e kursimeve nga emigracioni dhe me mbështetjen e programit “IPARD II” arrin të furnizojë konsumatorët me produkte me cilësi të lartë falë teknologjisë së aplikuar.
Gjatë vizitës në një nga punishtet artizanale të hapura në Vaun e Dejës, Presidenti Begaj u njoh me iniciativën e ndërmarrë para 10 vitesh nga endësja Meliha Zyberi e cila sot ka punësuar shumë gra të zonës dhe është një ndër zonjat që punon për ta përcjellë traditën etnokulturore te brezi i ri.
“Gardenland Agroturizëm Nana e Madhe”, ishte ndalesa tjetër e Presidentit Begaj në Bashkinë e Vaut të Dejës, i cili nga një restorant i vogël është shndërruar në një kompleks turistik i kompletuar me ekonomi ndihmëse ku përfshihen sera dhe mbarështimi i shpendëve shtëpiake./m.j
