Gjesti që bëri Linda Rama kur i shoqi e falënderoi.
Fitorja spektakolare e Partisë Socialiste në këto zgjedhje ka mbledhur në sheshin “Skënderbej” të gjithë fitimtarët protagonistë. Ata janë parë të gjithë shumë euforikë dhe të qeshur, sidomos gjatë kohës që Edi Rama mbante fjalën e rastit, një fjalim falënderues. Një nga falënderimet që bëri ishte edhe për bashkëshorten e tij, zonjën Linda Rama. Ai tha se forca e tij është Linda dhe e falënderoi publikisht.
Ndërkohë që i shoqi e falënderoi, Linda ngriti dy duart lart në shenjë mirënjohjeje, madje me një mimikë disi të surprizuar që i shoqi e quajti një nga faktorët kryesorë që ai ia del të fitojë beteja të vështira.
Linda njihet si një grua që mban profil të ulët në publik dhe nuk i pëlqen të rrijë në vijë të parë, aty ku është gjithmonë i shoqi. Në fushatë ajo nuk është parë fare, vetëm në mitingun përmbyllës në Vlorë.
Zonjat e PS-së përqafojnë me radhë Saimir Tahirin
Saimir Tahiri, ish-ministri i Brendshëm, ka qenë një ndër elementët më aktivë të kësaj partie në fushatë. Siç e kemi parë edhe nga faqja e tij në “Facebook”, ai ka punuar kryesisht me të rinjtë e Tiranës dhe siç e dimë Tirana dha rezultate shumë të mira në këto zgjedhje për Partinë Socialiste, ku njëri nga ata që ka meritë është edhe Tahiri.
Në mitingun e fitores, Tahiri është përqafuar nga Ermonela Felaj dhe Blerina Gjylameti me përzemërsi të veçantë. Mbase nga fushata mund të kishin edhe ditë të tëra pa u takuar…
Endri Fuga i kujton Ramës qytetin që harroi, por ai s’e ka mendjen
Emri i Endri Fugës, këshilltarit për media të Kryeministrit Rama, është dëgjuar shpesh të permendet nga ky i fundit në këtë fushatë. Rama pohoi se i dëgjon shumë këshillat e tij, prandaj ka marrë pjesë edhe në programe televizive të cilat me kohë kanë qenë qartazi kundër tij.
Në fjalimin që mbajti në sheshin “Skënderbej”, Rama falënderoi një për një të gjitha qarqet që votuan me shumicë PS-në, por harroi disa prej tyre. Pikërisht në këtë moment Endri Fuga i afrohet podiumit për t’ia kujtuar, por duket që Rama nuk arriti ta dëgjojë nga zhurma e madhe që sillte turma.
