Tre vëllezër në Shkodër janë vënë nën akuzë, pas dhunës së ushtruar ndaj dy personave, edhe ata vëllezër.
Mbrëmjen e djeshme, në vendin e quajtur rrotondo në afërsi të hotel “Argenti”, në qytetin e Shkodrës, Jetmir Karagjozi së bashku me dy vëllezërit e tij, janë konfliktuar duke i’u shkaktuar dëmtime vëllezërve A.T., dhe F.T., banues në Shkodër.
E sinjalizuar për ngjarjen, policia vuri në pranga Jetmir Karagjozi, 23 vjeç, banues në Shkodër, si dhe u shpallën në kërkim vëllezërit e tij A.Karagjozi 22 vjeç dhe D.Karagjozi 21 vjeç.
Gjatë kontrollit të ushtruar në makinën tip “Fiat” me targë BR 2679 B, në pronësi të Jetmir Karagjozi u gjet një armë zjarri e cila u sekuestrua në cilësinë e provës materiale.
Gjithashtu gjatë kontrollit të ushtruar në banesën e tre vëllezërve Karagjozi u gjetën dhe u sekuestruan në cilësinë e provës materiale edhe dy shkopa bejsbolli, tre thika dhe një dorezë hekuri.
Ndaj të dyshuarve vijojnë ende hetimet, ndërkohë që materialet i’u referuan Prokurorisë së Shkodrës për veprat penale “Plagosje e lehtë me dashje”, “Kanosja”, “Prodhimi dhe mbajtja pa leje e armëve luftarake dhe municionit”, “Prodhimi dhe mbajtja pa leje e armëve të ftohta” dhe “Drejtimi i automjetit pa dëshmi” 
