Në vijim të takimeve të tij në vizitën në Shtetet e Bashkuara të Amerikës, Kryetari i Kuvendit të Shqipërisë, Gramoz Ruçi, u takua me Kryetarin e Dhomës së Përfaqësuesve, Paul Ryan. Gjithashtu zoti Ruci dhe delegacioni që e shoqëron u prit në një takim nga Kryetarja e Demokratëve në Dhomën e Përfaqësuesve znj. Nancy Pelosi dhe nga Kryetari i Shumicës Republikane në Dhomën e Përfaqësuesve Kevin Mc Carthy.
Gjatë takimi me Kryetaren e Demokratëve në Dhomën e Përfaqësuesve znj. Nancy Pelosi, u vlerësuan marrëdhëniet shumë të mira ndërmjet SHBA-ve dhe Shqipërisë. Lidhur me këtë, znj. Pelosi u shpreh se: “Shqipëria është një aleat i rëndësishëm i Shteteve të Bashkuara në Amerikës në gadishullin e Ballkanit”.
Kryetari i Kuvendit të Shqipërisë, pasi e falënderoi Pelosin për mikpritjen, theksoi rëndësinë e vijimit intensifikimit të marrëdhënieve shumë të mira ndërmjet dy vendeve. Kuvendi njofton se e Ruçi vlerësoi kontributin e dhënë nga Kryetarja e Demokratëve në Dhomën e Përfaqësuesve në Kongresin Amerikan duke u shprehur se: “Keni mirënjohjen tonë për mbështetjen dhe angazhimin tuaj personal ndaj Shqipërisë”. /b.d
