Armina Mevlani po hyn dalëngadalë në rrethin e ngushtë të fashion-bloggers ndërkombëtarë.
Së fundmi, gjatë javës së modës në Milano, ajo ka takuar mbretëreshën e blogereve në botë, Chiara Ferragni si edhe ka ndjekur nga rreshti i dytë shumë prej sfilatave të rëndësishme Pranverë-Verë 2017 siç ishte sfilata e “Versace-s” me mbyllje nga Naomi Campbell.
Nëse dy vjet më parë, Mevlani shkonte të shihte këto sfilata si shikuese e thjeshtë, tashmë ajo ftohet si blogere, shkruan ‘Anabel’. Me rreth 363 mijë ndjekës në Instagram nga Shqipëria dhe bota, një faqe profesionale arminamevlani.com, dhjetëra marrëveshje reklamuese me marka të njohura botërore dhe një kontratë me një agjensi të njohur turke, Mevlani tashmë është fashionista e parë në Shqipëri që e ka kthyer pasionin e saj në biznes.
Ashtu siç bëri Ferragni në 2009, kur vendosi të hapte blogun e saj “TheBlondeSalad”. Blogu i nisur për të ndarë një pasion për veshjet, do t’i hapte rrugë një forme tërësisht të re reklamimi nga shtëpitë ndërkombëtare të modës, të cilat si kurrë më parë po shfrytëzojnë fashionistat si zëdhënëse të produkteve të tyre.
Në 2015-ën, ish-studentja italiane, regjistroi 12 milionë euro pasuri, vetëm nga reklamimet dhe bashkëpunimet e saj me shtëpi të njohura të modës. Miliona njerëz nga e gjithë bota e ndjekin çdo ditë Ferragnin në llogaritë e saj në Instagram, Snapchat dhe në faqen e saj personale “TheBlondeSalad” që tashmë është kthyer në një revistë online me sugjerime mode dhe bukurie.
Armina nga ana e saj, po shijon fillime të suksesshme si blogere dhe shumë shpesh ka kapur syrin e të huajve për individualitetin e 25-vjeçares në stil dhe ndikimin që ajo ka në veshje nga muzika, letërsia dhe kinemaja e viteve 50-të-90-të.
