David Bowie, George Michael, Umberto Eco – shumë artistë e njerëz të njohur të politikës u ndanë nga ne në vitin 2016. Një retrospektivë pikëllimi nga bota e artit, politikës dhe kinemasë.
David Bowie († 10. Janar, 69 vjeç)
Me të bota humbi një nga heronjtë e historisë së muzikës pop. Bowie diti të krijojë unversin e tij të pangatërrueshëm. Me lojën me identitetet artisti shkaktoi mjaft debat. 140 milionë disqe të shitur, një nga muzikantët më të suksesshëm botërorë.
Alan Rickman († 14. Janar, 69 vjeç)
Aktori i njohur anglez u bë i famshëm me filmat e “Harry Potter”, ku ai luante rolin e Severus Snape. Ai mori çmime të njohura si Emmy, dhe Golden Globe.
Umberto Eco (†19. shkurt, 84 vjeç)
Romani i tij “Emri i trëndafilit”, botuar në vitin 1980 e bëri Econ të famshëm. Romanet e shkrimtarit dhe intelektualit italian u përkthyen në 60 gjuhë. Eco ishte edhe profesor i semiotikës.
Guido Westerwelle († 18 mars 2016)
Ish-ministri i Jashtëm gjerman dhe ish-kreu i partisë liberale gjermane, FDP ndërroi jetë pas sëmundjes së leuçemisë akute. Pas trajtimeve dhe një periudhe përmirësimi, ku Westerwelle prezantoi librin e tij “Mes dy jetësh”, ish-ministri u sëmur sërish. Nga vitet 80-të ai ishte një nga figurat kryesore politike gjermane.
Hans-Dietrich Genscher († 31 mars 2016)
Genscher ishte ministri i Jashtëm gjerman që qëndroi më gjatë në post se të gjithë të tjerët, frymëzuesi i bashkimit gjerman në vitin 1990. E paharruar dalja publike në vitin 1989, në ballkonin e ambasadës çeke, ku ai u tha refugjatëve të RDGJ-së se do të lejohen të hyjnë në Gjermaninë Perëndimore. Politikani liberal arriti moshën 89 vjeçare.
Imre Kertesz († 31 mars 2016)
Shkrimtari hungarez dhe nobelisti i letërsisë ndërroi jetë pas një sëmundjeje të gjatë në moshë 86 vjeçare. Ai konsiderohet si një nga autorët më të rëndësishëm të letërsisë europiane pas Luftës së Dytë Botërore. Me librin “Roman i një të pafati” ai trajtoi periudhën e qëndrimit në kampet e përqëdrimit.
Prince († 21 prill, 57 vjeç)
Edhe vdekja e Prince e tronditi botën. Sërish ndahet nga jeta një artist që i dha tonin muzikës në shekullin e 20-të. Arsyeja duket të ketë qenë mbidozë e ilaçeve kundër dhimbjeve- Por këngët e tij si “Purple Rain” dhe “Kiss” nuk do të harrohen.
Bud Spencer ( † 27. qershor, 86 vjeç)
Shuplakat dhe goditja me grusht drejt në filmat e bënë Bud Spencerin të famshëm. Bashkë me Terence Hill ai krijoi një seri filmash-komedi të suksesshëm. Me emrin e vërtetë, Carlo Pedersoli, Spencer ishte jo vetëm aktor, por edhe shpikës, ideator dhe autor skenarësh.
Elie Wiesel († 2. korrik, 87 vjeç)
Angazhimi kundër shtypjes dhe diskriminimit ishte prioriteti kryesor i punës së shkrimtarit që humbi prindërit dhe motrën në Aushvic. Profesori dhe nobelisti i paqes, (1986) u bë i famshëm me librin “Nata”. Wiesel ka qenë ndër autorët më të njohur që shkruanin për Holokaustin.
Dario Fo († 13 tetor, 90 vjeç)
Pasioni i tij ishte satira. Shigjetat e shkrimtarit italian drejtoheshin kundër të fuqishmëve. Dario Fo e kuptonte letërsinë si zëdhënëse të të pafuqishmëve. Nobelisti i letërsisë shkroi mbi 70 vepra letrare dhe komedi.
Leonard Cohen († 7 nëntor, 82 vjeç)
Shumica e njohin si këngëtarin me zërin e ngjirur, i rrethuar nga një aureolë melankolie. Por krahas Bob Dylan, ai konsiderohet si një nga poetët më të rëndësishëm të muzikës pop. Në tetor u publikua albumi i fundit, një testament i artistit të sëmurë rëndë.
George Michael († 25 nëntor, 53 vjeç)
Sikur të mos mjaftonin humbjet këtë vit, pak para fundit të vitit ndërron jetë papritur edhe këngëtari George Michael. Me duetin “Wham” ai u bë i famshëm në vitet 80-të. George Michael, i cili qëndroi 40 vjet në skenë, shiti më shumë se 100 milionë albume.
