Autorët e dyshuar të vrasjes së studentit shqiptar në Bruksel në vitin 2015 kanë dalë para gjykatës penale në Belgjikë. Vincent De Bruycker dhe Denis Nikolovska, njëri belg dhe tjetri maqedonas akuzohen për vrasjen dhe copëtimin e trupit te studentit shqiptar nga Dukasi i Fierit Xhuliano Brahimllari, 22 vjeç në Koekelberg. Hetuesit kanë thënë se dy të arrestuarit janë autorët kryesore të vrasjes së studentit shqiptar dhe për ketë kanë edhe prova.
“Ne kemi bërë një analizë të ADN të sharrës së gjetur dhe në bazë të rezultateve dëshmuam se bëhet fjalë për gjakun e viktimës“, kanë shpjeguar hetuesit për mediat belge, raporton BalkanWeb.
Gjithashtu hetuesit kanë thënë se karta SIM e telefonit të viktimës është aktive deri në orën 17:00, ndërsa vrasja ka ndodhur në orën 17:36 dhe telefonatat e fundit kanë qenë me dy të akuzuarit.
Sipas hetimeve, dy personat të cilët ishin miq me viktimën kishin planifikuar ta vrasin shqiptarin dhe më pas ta masakrojnë duke i copëtuar pjesët e trupit, pasi kishin blerë një hanxhar, një sharrë dhe mjete të tjera të nevojshme.
Dyshohet se vrasja ka ndodhur për trafikun e kanabisit, pasi viktima dhe dy të akuzuarit kishin një plantacion kanabisi.
Ngjarja horror:
Paraditen e 9 qershorit 2015, punëtorët e komunës Jette në Belgjikë, në kufirin midis Jette dhe Ëemmel bënë një zbulim tronditës. Ata gjetën një valixhe të madhe sportive, me ngjyrë të verdhë, e cila kishte brenda një bust njeriu, të cilit i mungonte koka, parakrahët dhe një pjesë e këmbëve. Pavarësisht se identifikimi i trupit të gjymtuar ishte i vështirë, më në fund u konkludua se ai i përkiste shqiptarit 22-vjeçar Xhuliano Brahimllari, nga Dukasi i Patosit. Mësohet se ka qenë një prej xhaxhallarëve që e ka identifikuar nëpërmjet tatuazhit që kishte në trup i riu.
