Qindra qytetarë të cilët jetojnë në zonën pranë Liqenit të Thatë do të shpëtojnë njëherë e mirë nga balta gjatë reshjeve të shiut dhe nga pluhurat gjatë verës duke iu gëzuar një rruge me të gjitha standardet e nevojshme.
Bashkia e Tiranës ka nisur rehabilitimin e rrugës e cila kalon përmes pallateve të reja të ndërtuara pas viteve ’90, por ku nuk ishte menduar për përmirësimin e infrastrukturës gjatë kohës që kjo zonë ishte nën administrimin e ish-Komunës së Farkës. Siç mund të shihni edhe nga këto foto, mjetet e rënda të ndërmarrjes Nr. 2 të Bashkisë së Tiranës krahas punimeve nëntokësore, aktualisht po shtrojnë çakullin duke e përgatitur për asfaltin.
Prej vitesh banorët e kësaj zone ankoheshin se mungesa e rrugës po dëmtonte automjetet e tyre, ndërsa krijonte mjaft probleme edhe për kalimtarët. Gjatë këtyre tre viteve, Bashkia e Tiranës ka nisur një sërë projektesh të rëndësishme për sistemimin e blloqeve ndërmjet pallateve, por edhe për ndërtimin e rrugëve të reja duke menduar për herë të parë edhe për urbanizimin e këtyre zonave.
