Mali i Munellës, përveç panoramës së jashtëzakonshme që ofron, njihet edhe si mali ku strehohet rreqebulli i Ballkanit, një kafshë që rrezikon të zhduket. Ky masiv pyjor që shtrihet në rrethet Pukë dhe Mirditë njihet për florën dhe faunën e pasur, çka mund ta kthejë atë në një destinacion të paharruar turistik. Por gjuetia e paligjshme dhe prerja e kundraligjshme e pyjeve po e rrezikon vazhdimisht. Munella njihet edhe për pasuritë e jashtëzakonshme nëntokësorë, kryesisht bakër dhe zink.
Organizata për mbrojtjen e mjedisit, PPNEA ka publikuar pamje të kafshëve të egra në rajonin e Pukë – Mirditës.
“Kontrolli i parë i kamerave-kurth na surprizoi me disa foto të mrekullueshme të Rrëqebullit të Ballkanit, – njoftoi sot PPNEA, – një nënlloj i rrezikuar në mënyrë kritike. Fotografimi i rrëqebullit të Ballkanit dhe llojeve të tjera, si ariu i murrmë, ujku, dhelpra, lepuri dhe baldosa theksojnë edhe njëherë biodiversitetin e pasur të rajonit Pukë-Mirditë.
Jemi të lumtur të ndajmë me ju rezultatet e para të sezonit të monitorimit dimër-pranverë 2017.”/Alfons Çupaj/Javanews.al
