Vendimi i dhënë sot nga Gjykata Ndërkombëtare e Arbitrazhit Sportiv (CAS) ka sjellë një lumë me reagime nga të gjithë shqiptarët kudo ku ndodhen, përfshirë edhe kryeministrin Edi Rama.
Ky i fundit, përpos ngacmimeve në Tëitter me homologun e tij serb, ka shprehur mbështetjen e tij për Kombëtaren Kuqezi. Dhe si një tifoz i mirëfilltë futbolli dhe sportadashës, krahas postimeve, shefi i qeverisë ka ndryshuar edhe fotografinë e cover-it në Facebook.
Rama ka vendosur foton e bulevardit të mbushur plot e përplot me zemra kuqezi në Tiranë dhe që daton në fitoren e Shqipërisë ndaj Greqisë në vitin 2004.
Kjo si për t’i treguar homologut Vuçiç krenarinë e shqiptarëve dhe se çfarë e pret atë dhe të gjithë ekipin e Serbisë në ndeshjen e kthimit në Shkodër.
Por krahas zemrave të pafundme kuqezi, për këtë ndeshje do të jetë gati edhe stadiumi i ri “Loro Boriçi”.
