Pa kaluar ende tre ditë nga inaugurimi, Këndi i fëmijëve te Liqeni i Tiranës ka marrë goditjen e parë. Në rrjetet sociale qytetarë të ndryshëm kanë postuar fotografi që tregojnë se Këndi nuk mund t’i shpëtonte kurrësesi vandalizmave.
Katër koshat e basketbollit të vendosur në hapësirën e parkut janë thyer, ndërsa fotot e mëposhtme tregojnë sesi ishin në datën 1 Qershor dhe sesi janë sot. Po ashtu, një faqe në Facebook që përfaqëson qëndrimin e protestuesve kundër këndit, ka postuar një fotografi ku duket një nga kodrat e vogla të veshura me bar artificial.
Autori i fotografisë e ka shkepur tapetin me bar vetëm për të treguar se aty poshtë ka… beton! Protestat e dhunshme të disa individëve dhe PD e kanë paralajmëruar në fakt një sjellje të tillë ndaj parkut që mesa duket do vijojë t’i ketë armiqt edhe pse aty nuk ka një kafene që u bë ‘molla e sherrit’. (javanews.al / r.a)
