Ligji që lejon importin e mbetjeve nga jashtë, u kundërshtua nga shqiptarët në mbarë botën. Protesta në Tiranë nuk ishte e vetmja. Edhe në Londër, përballë ambasadës shqiptare u protestua për t’i thënë JO ligjit të mbetjeve, ose siç rëndom thuhet “të plehrave”.
Ndërsa kryeministri Edi Rama e ka mbrojtur me forcë këtë ligj duke thënë se shoqëria civile është në gabim, dhe se riciklimi në Shqipëri i mbetjeve të sjella nga jashtë nuk është i rrezikshëm për shëndetin, një tjetër Edi Rama mendon ndryshe.
Ai është 25-vjeçar dhe është nga Librazhdi. Rastësi apo jo, Edi Rama që jeton në Londër, është kundër importit të plehrave.
Foton e ka bërë publike Daniel Nikolla, i riu shqiptar i cili u bë i njohur me historinë e tij në një video të UEFA-s për kampionatin europian të futbollit ku Shqipëria u përfaqësua për herë të parë./Tema/a.m.
