I jepet zgjidhje ndotjes akustike, por dhe tymrave të shkaktuara nga një lokal në zonën e ish-Bllokut. Pas ankesave të vazhdueshme të banorëve të lagjes, të cilët kanë shprehur shqetësimin e tyre, jo vetëm për zhurmën e shkaktuar nga gjeneratorët dhe motorët që përdoreshin nga lokali për të shpërndarë ushqimet, por edhe për depozitat e gazit që konsiderohen si një kërcënim permanent për jetën e tyre, është ndërhyrë së fundmi duke i dhënë fund kështu një problemi të mbartur prej vitesh. 
Siç shihet edhe nga fotot, situata në këtë bllok pallatesh ka qenë shumë e rëndë dhe lidhur me shqetësimin e banorëve, drejtuesit e këtij biznesi ishin vënë në dijeni disa herë duke u kërkuar që të nderhynte për të shmangur çdo rrezik.
Në mungesë të një reagimi pozitiv është ndërhyrë nga organet shtetërore duke larguar gjeneratorin që shkaktonte zhurmë shqetësuese për gjithë zonën, por edhe depozitat e ujit apo gazit që siç shihet nga fotot, ishin kthyer në një problem për banorët e ish-Bllokut. Largimi i këtyre pajisjeve ka rikthyer qetësinë te banorët, por edhe hapësirat e lira mes pallateve duke i dhënë më shumë frymëmarrje zonës.
