Një imazh i shkrepur në vitin 2014 në Venice të Kalifornisë dokumentoi një skenë të pazakontë dhe dramatike: një grua e fshehur në çatinë e banesës së saj, ndërsa, vetëm pak metra më larg, një burrë dilte nga dritarja dhe e ndiqte.
Protagonistja e kësaj ngjarjeje ishte Melora Rivera, aktore dhe skenariste 29-vjeçare. Ajo ishte zhvendosur në Venice vetëm tre javë më parë kur një hajdut hyri me forcë në shtëpinë e saj dhe e detyroi të kërkonte shpëtim në çati.
Personi që e ndoqi ishte Christian Hicks, një i pastrehë me një histori të gjatë kriminale. Pasi theu derën kryesore të banesës, ai hyri brenda dhe ndoqi Riverën deri në dhomën e gjumit. Kur ajo doli në çati përmes dritares, Hicks përdori të njëjtën rrugë për ta ndjekur.
Rivera po fliste me shërbimet e emergjencës në telefon kur një blogere lokale fotografoi momentin ku të dy ndodheshin mbi çati. Pamjet u publikuan nga mediat dhe shumë shpejt u përhapën në SHBA, por edhe në vende të tjera të botës.
“Ndjehesha sikur isha protagoniste e një thrilleri. Ishte tmerruese. Të gjitha instinktet e mia më thoshin të largohesha që andej”, kujtonte Rivera në atë kohë.
Sipas rrëfimit të saj, ajo ishte në gjumë kur dëgjoi zhurma te dera e përparme, ku dikush po përpiqej të hynte. Dhoma e gjumit ndodhej në papafingo dhe zhurma e zgjoi.
Në fillim, aktorja kontrolloi telefonin, duke menduar se ndoshta një i njohur po i shkruante për ta njoftuar se do të shkonte në shtëpinë e saj.
Kur zbriti dhe pa nga dritarja, ajo vuri re një burrë që po largohej dhe që fliste me vete. Rivera besoi se rreziku kishte kaluar. Madje mendoi të bënte një dush përpara se të shkonte në punë, por në fund vendosi të kthehej në shtrat.
Rreth 15 minuta më vonë, burri u shfaq sërish.
Kësaj radhe ai nisi të godiste derën e banesës me shpatull. Nga dhoma e saj, Rivera pa se dera hapej gjithnjë e më shumë pas çdo goditjeje.
“Ai nuk ndalej. Ai ishte i vendosur të vazhdonte derisa të hynte brenda”, tregonte ajo.
29-vjeçarja telefonoi menjëherë 911. Teksa po i jepte operatorit adresën, një pjesë e konsiderueshme e derës u shemb dhe ajo pa dorën e Hicksit të zgjatej brenda për ta hapur.
Duke kuptuar se nuk mund të priste më, Rivera hapi një nga dritaret e ulëta të dhomës së gjumit, hoqi rrjetën dhe u zvarrit drejt çatisë.
“Unë fjalë për fjalë u zvarrita nga dritarja. Në momentin që hajduti vuri këmbën në shtëpinë time, unë vura këmbën në çati”, kishte rrëfyer aktorja. Por arratisja e saj nuk mjaftoi për ta lënë pas ndjekësin.
Hicks u ngjit në dhomën e gjumit dhe doli nga e njëjta dritare. Rivera tregoi se, ndërsa po ngjitej mbi çati, pa kokën e tij të shfaqej në dritare.
“Atëherë e kuptova se ishte në çati me mua.” Pikërisht ky çast u fiksua në fotografi dhe më pas u shndërrua në një nga imazhet më të komentuar të ngjarjes.
Një kalimtar që e pa skenën ndaloi një makinë policie dhe njoftoi autoritetet. Në të njëjtën kohë, Rivera vijonte të qëndronte në linjë me 911.
Pas pak minutash, në zonë mbërritën forca të shumta policie dhe zjarrfikës. Këta të fundit i vendosën Riverës një shkallë për të zbritur, ndërsa policët arritën ta bindnin Hicksin të largohej nga çatia dhe më pas e arrestuan.
E gjithë ngjarja, sipas aktores, zgjati rreth 30 minuta.
“Kishte gjashtë oficerë policie në vendngjarje, një helikopter që fluturonte sipër dhe një grup njerëzish që shikonin nga trotuari. Dhe unë isha bllokuar në një çati pa pantallona. Ishte çmenduri”, kishte thënë ajo.
Rivera kujtonte gjithashtu se kishte menduar edhe mundësinë për t’u hedhur nga çatia, nëse kjo do të ishte mënyra e vetme për t’i shpëtuar burrit që e ndiqte.
“Nëse policia nuk do të kishte mbërritur shpejt, kush e di çfarë mund të kishte ndodhur. Po mendoja ndoshta duhet të kisha kërcyer nga çatia”, deklaronte ajo.
Pas incidentit, aktorja tha se vazhdonte ta rikthente në mendje atë ditë, duke imagjinuar skenarë të ndryshëm dhe mënyra të tjera se si mund të kishte përfunduar gjithçka.
“Nuk po përpiqesha të isha një episod i Law & Order. Nuk doja të vdisja para se të fillonin titrat e fundit”, ishte shprehur Rivera.
Christian Hicks u arrestua menjëherë pas ngjarjes së vitit 2014. Sipas të dhënave gjyqësore të cituara nga Daily Mail, ai arriti një marrëveshje pranimi fajësie me prokurorët dhe u dënua me tre vjet burg.
Pas lirimit, megjithatë, Hicks u përfshi përsëri në veprimtari kriminale.
Në vitin 2018, ai u arrestua nën akuzat për vjedhje me thyerje dhe sulm seksual. Pas një marrëveshjeje me prokurorët, dënimi i tij ishte më pak se një vit burg.
Akuzat më të rënda ndaj tij u ngritën në vitin 2021, kur Hicks u arrestua për vepra që përfshinin përdhunimin dhe rrëmbimin.
Pas një procesi gjyqësor që zgjati disa vite, ai u dënua në vitin 2023 me 37 vjet burg. Sipas të dhënave të cituara në raportime, Hicks do të mund të kërkojë lirimin me kusht në shtator të vitit 2043.
Historia e ndjekjes së frikshme mbi çatinë e një shtëpie në Venice dhe dënimi i gjatë i Christian Hicks për krime të tjera të rënda vijojnë të kujtohen përmes fotografisë së vitit 2014, e cila kapi në një çast një prej përvojave më të tmerrshme të jetës së Melora Riverës.
