Ish-kryetarja e Këshillit të Lartë Gjyqësor, Naureda Llagami, i është drejtuar Gjykatës Administrative të Shkallës së Parë Tiranë me një kërkesë për të pezulluar vendimin e Mbledhjes së Posaçme të Gjykatës së Lartë, lidhur me procedurat për plotësimin e një vakance në Gjykatën Kushtetuese.
Në kërkesën e saj, Llagami i referohet vendimit nr. 2, datë 30 shtator 2025, të Mbledhjes së Posaçme të gjyqtarëve të Gjykatës së Lartë, duke kërkuar që ai të pezullohet deri në zgjidhjen përfundimtare të çështjes.
Sipas dokumentit, procedura nisi pas përfundimit të mandatit të gjyqtares së Gjykatës Kushtetuese, Holta Zaçaj, në dhjetor 2024. Gjykata e Lartë shpalli hapjen e aplikimeve, ku ndër kandidatët aplikoi edhe Naureda Llagami. Pas verifikimit të dokumentacionit, Këshilli i Emërimeve në Drejtësi (KED) me vendimin nr. 17, datë 17 qershor 2025, lejoi kandidimin e saj për këtë post.
Llagami pretendon se vendimi i fundit i Mbledhjes së Posaçme të Gjykatës së Lartë kërkon që të pezullohet zbatimi i vendimit si dhe procedurat deri në një vendim përfundimtar të Gjykatës Administrative.
Çështja tashmë i kalon për shqyrtim Gjykatës Administrative të Shkallës së Parë Tiranë, e cila do të vendosë nëse do të pranojë pezullimin e kërkuar.
Procesi i përzgjedhjes së gjyqtarit të ri kushtetues ka pasur një episod të dyshimtë, i cili mund të ndryshonte tërësisht rrjedhën e vendimmarrjes.
Vota e shpallur e pavlefshme, në fakt tregonte qartësisht se ishte në favor të kandidates Naureda Llagami, ish-kryetare e Këshillit të Lartë Gjyqësor.
Më herët, kandidatja për anëtare të Gjykatës Kushtetuese, znj. Naureda Llagami, i është drejtuar me një kërkesë zyrtare Gjykatës së Lartë, duke kërkuar të njihet dhe të pajiset me kopjen e plotë të dosjes që lidhet me procesin e zhvilluar më 30 shtator 2025 në Gjykatën e Lartë.
Në kërkesë, Llagami thekson të drejtën e saj për një proces të rregullt ligjor dhe i kërkon Gjykatës së Lartë që të përcaktojë sa më parë datën dhe orën kur ajo mund të njihet me dokumentet dhe të tërheqë kopjen e plotë të dosjes.
Kujtojmë se znj. Llagami mori 9 vota, tre më shumë se kandidati tjetër Asim Vokshi, i cili u shpall fitues pasi mori vetëm 6 vota. Por një fletë votimi, e cila shprehte qartësisht mbështetjen për znj.Llagami pasi ishte shënjuar dy herë emri i saj, u shpall e pavlefshme. Kjo votë, nëse do të ishte lexuar siç duhej do të ishte qartësisht shprehja e vullnetit të drejtë dhe rrjedhimisht do të mundësonte përmbushjen e kriteteve ligjore që ajo të merrte detyrën. Por mosleximi i drejtë i votës, qartazi në mënyrë të njëanshme, ndryshoi rezultatin.
Vendimi për të shpallur të pavlefshme një fletë votimi që mbështeste zj. Llagami ka ngjallur reagime të forta mes juristëve. Nuk bëhet fjalë për një votë të paqartë apo të gabuar në përmbajtje, por për një interpretim teknik të një elementi formal që, sipas shumë juristëve, nuk duhet të kishte ndikuar në vlefshmërinë e votës.
Naureda Llagami, ish-kryetare e Këshillit të Lartë Gjyqësor, një ndër zërat më koherentë për pavarësinë e institucioneve të reja të drejtësisë, ka fituar respektin e ndërkombëtarëve dhe të shoqërisë civile për qasjen e saj transparente dhe refuzimin e kompromisit politik në proceset kyçe të reformimit të drejtësisë shqiptare.
