Autoritetet maqedonase pas përfundimit të aksionit dyditor në Kumanovë, ku policia maqedonase u përlesh me një grup të armatosur shqiptar, bënë të ditur edhe bilancin e viktimave.
Ministria e Brendshme e Maqedonisë tha se në këtë aksion u vranë 8 policë dhe 14 pjesëtarë të grupit të armatosur.
Mediat maqedonase kanë publikuar edhe fotografitë e 8 policëve të vrarë maqedonas.
Po ashtu nga ana e saj Ministria e Punëve të Brendshme e Maqedonisë, ka publikuar një video e cila përmban imazhe të disa prej të arrestuarve në Kumanovë.
Në videon shihen gjashtë persona që pretendohet se janë pjesë e grupit të armatosur të UÇK-së i cili për dy ditë rrjesht mori pjesë në përleshjen e armatosur në Kumanovë.
