Pas muajsh kërkime policia greke dhe ajo italiane njoftuan se kanë arrestuar një shqiptar, i cili akuzohet se është shoferi i “Audit të verdhë”, që u shndërrua në tmerrin e pjesës verilindore të Italisë. Mediat italiane referuar policisë raportojnë se ai quhet Vasil Rama. “Eshtë ky, sipas hetimeve, drejtuesi i Audit të verdhë”, që terrorizoi Italinë”- thonë burime të policisë.
Nga ana tjeter edhe autoritetet greke njoftuan se kanë arrestuar shtetasin Vasil Rama, 36 vjeç, i shpallur në kërkim ndërkombëtar nën akuzën e grabitjes së dhunshme dhe një sërë veprash të rënda penale. Sipas autoriteteve greke, 36-vjeçari Rama ndodhej në bordin e një automjeti, në kohën që tentoi të kalonte në pikën kufitare të Kapshticës, me drejtim Shqipërinë. Policia greke thotë se 36-vjeçari nuk bëri rezistencë gjatë arrestimit.
Il gazzettino.it publikon edhe foton e shqiptarit. Ai u kap falë bashkëpunimit të ministrisë së Brendshme italiane me policinë greke. Shqiptari po qëndron në vendin fqinj, në pritje të procedurave për ekstradimin, pasi do të përgjigjet para drejtësisë italiane.
Policia njoftoi aso kohe se makina u vodh në Milano me 26 dhjetor 2015. Banda që shëtiste me të e bënte vjedhje e grabitje arrinte ti shpëtonte gjithnjë ndjekjes së policisë. Tre shqiptarët udhëtonin me të me shpejtësi që arrinte deri 270 km në orë. Ata u pikasën kur aksidentuan një grua në rrugë. Audi u gjet i djegur mes komunave One’ di Fonte dhe Asolo të Trevizos, kohë kur policia nisi të hetonte më pas edhe për shenjat që mund të kishin lënë autorët.
Sipas medieve italiane, anëtarët e kësaj bande kanë kryer në zonën e veriut të Italisë një sërë grabitjesh të dhunshme. Organizata mori emrin “banda e Audit të verdhë”, pasi në të gjitha rastet e grabitjeve, anëtarët e saj përdornin një automjet të markës Audi me ngjyrë të verdhë. Ata largoheshin nga vendngjarja me shpejtësi të madhe.
Autoritetet italiane shprehën besimin se, me arrestimin e Vasil Ramës do të zbardhen tërësisht aktet e kësaj bande. Vasil Rama u dërgua në Gjykatën e Follorinës, e cila do të vendosë brenda 3 ditëve për ekstradimin e tij në Itali. Burime nga Policia e Follorinës i thanë Top Channel se ekstradimi i Ramës është i sigurtë dhe do të kryhet me procedurë të përshpejtuar, për shkak të rrezikshmërisë së veprave penale që rëndojnë mbi të.
ma.me
