Dy trafikantë janë arrestuar nga policia italiane duke transportuar një sasi të madhe kokaine. Njëri prej tyre është një 29-vjeçar shqiptar identiteti i të cilit nuk është bërë i ditur, kurse tjetri shtetas italian 58 vjeç.
Gjatë një operacioni anti-drogë në zonat Valdarno dhe Valdisieve, autoritetet italiane sekuestruan 23 kg kokainë të pastër e ndarë në pako 1 kilogramëshe. Lënda narkotike u zbulua në dy makina të ndryshme dhe vlera e saj shkon deri në 12 milionë Euro nëse do të shitej me pakicë. Një pjesë e drogës u gjet në makinën Volkswagen Jetta që drejtohej nga shqiptari, kurse gjysma tjetër në makinë Citroen DS-5 në bordin e së cilës ndodhej 58-vjeçari italian, shkruan tvklan.al
Nga kontrolli në shtëpinë e 29-vjeçarit nga Shqipëria u gjetën edhe 16.450 Euro. Dy trafikantët u arrestuan në flagrancë gjatë një operacioni blic në momentin që do të niseshin për të dërguar “porosinë”.
Hetuesit italianë po punojnë për të zbuluar persona të tjerë të përfshirë në këtë veprimtari kriminale.
a.ç
