Nju Jorku është në ankth nga hipoteza e një vale të dytë të Covid-19. Shkollat janë mbyllur dhe kufizimet e reja po shfaqen në horizont. Ndërkohë, “Big Apple” ende po merret me valën e parë të pandemisë të pranverës së kaluar. Rreth 650 kufoma njerëzish që kanë vdekur nga virusi në valëne parë në muajin prill ndodhen ende të vendosur në kamionë frigoriferikë në bregun e lumit në Brooklyn.
Trupat u përkasin njerëzve, për të cilët familjet nuk mund të gjurmohen ose njerëzve që nuk mund të përballonin varrimin. Kamionët në frigoriferë u vendosën si një morg emergjence gjatë kulmit të pandemisë dhe autoritetet kanë punuar që prej asaj kohe për të gjetur dhe ndihmuar familjet e viktimave.
Zbulimi rreth trupave që ende nuk kanë një varr, ka ndodhur në një kohë që qyteti është në ankthin e një vale të dytë. Kryebashkiaku Bill de Blasio ka urdhëruar mbylljen e shkollave publike dhe nuk përjashtohet që kufizime të tjera së shpejti mund të shkaktohen në një përpjekje për të përmbajtur virusin.
Në fakt, pandemia në Shtetet e Bashkuara ka regjistruar më shumë se 110,000 raste në ditë në muajin e fundit, me kulmin deri në 200,000 raste. Ndërsa numri i vdekjeve ka shkuar mbi 256 mijë persona që nga nisja e saj në dimrin e shkuar.
Situata është veçanërisht serioze edhe në El Paso, Texas, ku kryebashkiaku Dee Margo kërkoi dhe mori ndërhyrjen e Gardës Kombëtare për të ndihmuar morgjet e qarkut të mbingarkuara nga numri i lartë i vdekjeve nga Covid.
Ndërkohë, kufizimet kanë hyrë në fuqi në pothuajse të gjitha shtetet e SHBA-së përpara Ditës së Falënderimeve, e cila bie të enjten e fundit të nëntorit. Shpresa për ta përballuar këtë situatë, ka të bëjë me një vaksinë të mundshme së shpejti.
Pfizer dhe BioNTech i kanë paraqitur administratës së Ushqimit dhe Barnave kërkesën për një autorizim urgjent të vaksinës së tyre dhe sipas Moncef Slaoui, kreu i Operacionit Warp Speed, vaksinimet mund të fillojnë tashmë në mes të dhjetorit.
g.kosovari
