Racing Club ia doli të fitojë titullin kampion në Argjentinë, duke përfunduar një kampionat që e dominoi që në javën e parë e deri në atë të fundit.
Delir i madh për të gjithë tifozët, festë e madhe në qytet dhe lot gëzimi për titullin e fituar që pas vitit 2014. Ky është trofeu numër 18-të në historinë e klubit në historinë 116-të vjeçare, teksa në kupolën drejtuese është edhe Diego Milito, ish-sulmuesi i Interit.
Tifozi më i veçantë i Racing është padyshim Gabriel Aranda, i cili merr në stadium me vete gjyshin e tij të vdekur, Valentin Aguilera.
Po po, mirë e lexuat. Në çdo ndeshje Aranda shkon tek kutia ku mban kockat e mbetura nga trupi i gjyshit dhe e merr me vete në stadium, ashtu bëri edhe në ndeshjen e fundit, vetëm se këtë herë i bëri shëtitje edhe në qytet, duke festuar titullin.
“Isha në kamare dhe e nxora gjyshin prej aty. E bëj gjithmonë sa herë luan Racing. Kjo është një traditë e jona dhe gjyshi ndihet krenar që e kam nxjerrë jashtë për të festuar titullin kampion”, tha tifozi i veçantë.
