Një person u vra dhe disa të tjerë u plagosën në një shpërthim në një rafineri në pronësi të degës holandeze të grupit zviceran Gunvor, në portin e Roterdamit të martën, tha policia.
Policia e Roterdamit i tha AFP-së dhe Agjencia e Lajmeve të Athinës raportoi se shpërthimi ndodhi rreth orës 11:30 sipas orës lokale, në objektet e Gunvor Energy në Roterdam, të vendosura në Europoort, një nga zonat portuale, e cila është një nga zonat më të mëdha industriale kimike dhe petrokimike në botë.
Roterdami është porti më i madh i Evropës dhe përfshin rafineri nafte, terminale të LNG-së dhe shumë uzina petrokimike. Shell, Exxon Mobil, BP dhe Gunvor Energy janë ndër kompanitë kryesore të energjisë që operojnë në port.
Incidenti rezultoi në vdekjen e një personi, thanë autoritetet, por ato nuk ishin në gjendje të përcaktonin numrin e të plagosurve ose gjendjen e tyre.
“Këtë mëngjes, një nënkontraktor po kryente punime mirëmbajtjeje në një pus rezervuari dhe gjatë këtyre punimeve ndodhi një aksident”, tha për AFP një zëdhënës i Gunvor Energy në Roterdam.
Një hetim është nisur për të përcaktuar shkakun e aksidentit. Një zëdhënës i policisë tha se nuk kishte asnjë shenjë të menjëhershme për sabotim, por ky ishte një nga skenarët që po hetohej.
Kompania tha se po bashkëpunonte me autoritetet.
Ambulancat dhe një helikopter mjekësor u dërguan menjëherë pas shpërthimit, sipas raportimeve të medias.
Shpërthimi nuk pati ndikim në funksionimin e terminaleve të LNG-së në port, tha një zëdhënës i portit. Ai shtoi se nuk kishte lidhje midis shpërthimit dhe ndërprerjeve të energjisë që ndodhën më herët sot.
“Shell” tha se operacionet e saj në port nuk u prekën nga shpërthimi.
ExxonMobil mbylli të gjitha njësitë në rafinerinë e saj në Roterdam me 191,000 fuçi në ditë për shkak të një ndërprerjeje të energjisë, tha kompania konsulente Wood Mackenzie në një shënim për klientët e parë nga Reuters.
