Forcat e RENEA-s janë vendosur mbrëmjen e sotme në qytetin e Durrësit, për shkak të situatës të krijuar pas atentatit ndaj prokurorit Arjan Ndoji. Siç shihet edhe nga foto e siguruar nga Top Channel, mjetet e RENEA-s ndodhen në qytetin bregdetar.
Makina me të cilën udhëtonte Arjan Ndoji, së bashku me dy persona të tjerë, Landi Muharremi dhe Andi Maloku, u godit pasditen e sotme me breshëri plumbash pranë mbikalimit të Shkozetit, në autostradën Tiranë-Durrës.
Të tre personat morën plagë, por në gjendje më të rëndë paraqitet shoferi i makinës, Andi Maloku.
Ndërkohë policia vazhdon që ta mbajë të rrethuar spitalin teksa brenda ndodhet Andi Maloku ku po merr mjekim pasi është plagosur rëndë.
Ndërkohë është gjetur një makinë në Ishëm ku brenda saj kishte dy kallashnikov si dhe maska. Kjo makinë dyshohet të jetë e autorëve.
