Reforma në drejtësi mbetet padyshim tema më e nxehtë dhe reforma më e rëndësishme e këtyre 25 viteve pluralizëm në Shqipëri. Për këtë reformë janë investuar maksimalisht ndërkombëtarët, por ka ngecur puna te politika. Partia Demokratike ka kushte dhe ka vënë prioritet reformën zgjedhore. Por përpos kësaj, argumenti më i ri është se projektii pranuar ndërkombtarisht është i komplikuar e nuk kuptohet.
Ky argument i Bylykbashkit është bërë objekt bisede në rrjetet sociale, të cilat kanë bërë një krahasim deklaratash që nxjerrin në pah kundërshtinë e PD-së ndaj reformës dhe presionin ndërkombëtar.
Bylykbashi shkruan në Facebook:
“Quiz per reformen ne drejtesi.
Faza 1 – Gjeni kuptimin e ketyre akronimeve: KLGj, KLP, GjK, GjL, GjLA, KED, ILD, TDD, PP, PPA, BKH, KPK, KPpGjK
E veshtire apo jo? Ai qe eshte ne gjendje te zgjidhe menjehere rebusin e mesiperm, sigurisht qe kualifikon per fazen e dyte.”
Ndërkohë që ambasadori Lu deklaroi se:
“Këtë javë pata një diskutim me një politikan që pretendonte se populli shqiptar nuk e kupton dot vërtet debatin për reformën në drejtësi. Sinqerisht, kjo është tipike për arrogancën e politikanëve dhe të elitës shqiptare që besojnë se vetëm ata janë boll të zgjuar për të kuptuar se çfarë ndodh në shoqërinë shqiptare”.
Nga ana tjetër komisioneri Johannes Hahn foli hapur kur tha:
“Përshëndes punën konstruktive të bërë deri tani për reformën themelore të drejtësisë në Shqipëri që është mbështetur nga ekspertë vendorë dhe ndërkombëtarë si Euralius, OPDAT apo Komisioni i Venecias. Një miratim i shpejtë i reformës dhe zbatimi i saj pasues është tashmë kyç. Kjo jo vetëm që do t’i përgjigjej mbështetjes së madhe publike në Shqipëri për reformimin e sistemit të drejtësisë, por do të sinjalizonte gjithashtu një angazhim të qartë ndaj standardeve evropiane dhe procesit të integrimit evropian.”
Topi është në krahun e PD-së. Mbetet të presim takimin Rama-Basha të hënën. /lexo.al
