Në Shën Petersburg, ku po mbahet samiti Rusi-Afrikë ka marrë pjesë presidenti Vladimir Putin, ndërsa nga disa imazhe të postuara në rrjete sociale, aludohet se i pranishëm është edhe shefi i grupit mercenar Wagner, Yevgeny Prigozhin, nëse është e vërtetë kjo do të ishte përballja e parë e tyre pas dështimit të kryengritjes një muaj më parë.
Vendndodhja e Prigozhin ka qenë subjekt i shumë spekulimeve që nga rebelimi i tij i dështuar dhe mërgimi i dukshëm në Bjellorusi në qershor.
Sky News ka verifikuar se imazhi është bërë në hotelin Trezzini Palace në Shën Petersburg. Përputhet saktësisht me imazhet ekzistuese të hotelit në Google.
Sky News s’ka mundur të verifikojë nëse imazhet janë realizuar sot, që është dita e parë e samitit Rusi-Afrikë.
Bashkëpunëtori i Progozhinit, Dmitry Syty, i cili është kryetar i Qendrës Kulturore të Rusisë në Republikën Qendrore të Afrikës (RQA), e publikoi në rrjetin social Telegram një fotografi me përfaqësuesit e RQA-së më 27 korrik, për të cilën thotë se ishte bërë në takim, shkruan rel.
Fontanka raporton se fotografia ishte bërë në Hotelin Trezine, i cili është në pronësi të familjes së Prigozhinit.
Megjithëse vendndodhja e Prigozhinit ka qenë mister muajin e fundit, besohet se ai lëviz mes Rusisë dhe Bjellorusisë.
Presidenti i Bjellorusisë, Alexander Lukashenko, i mirëpriti forcat e Wagner-it në vendin e tij, pasi e kishte ndërmjetësuar një marrëveshje mes Kremlinit dhe Prigozhinit në qershor, duke i dhënë fund rebelimit të dështuar të grupit kundër liderëve të ushtrisë ruse.
Prigozhini e ka regjistruar një “kompani për menaxhimin e patundshmërisë” në Bjellorusi javën e kaluar me emër Concord Management and Consulting.
Dokumentet e analizuara nga mediumi i pavarur bjellorus reform.by, tregojnë se kompania është regjistruar në adresën e njëjtë të fshatit ku është i vendosur kampi mercenar Wagner./m.j
