Izmiri është qyteti i dytë i madh që e ka tronditur presidentin turk, Recep Tayyip Erdogan, me rezultatin e votimit të referendumit të sotëm për ndryshime kushtetuese. 67.77% të qytetarëve të Izmirit kanë votuar kundër ndryshimeve kushtetuese që do t’i jepnin pushtet të ri gjithëpërfshirës presidentit Erdogan, transmeton Express. Ndërkohë, vetëm 32.17% kanë votuar në favor të ndryshimeve. Recep Tayyip Erdogan, ka marrë goditje të rëndë edhe në kryeqytetin Ankara. Ai pas humbjes në Stamboll e Izmir, rezultat dëshprues ka marrë edhe në Ankara. Rreth 50.10 për qind e qytetarëve kanë votuar kundër si dhe 49.90% pro.
Sa të rëndësishme janë ndryshimet kushtetuese?
Ato do ta përfaqësonin programin më gjithëpërfshirës të ndryshimeve kushtetuese qëkur Turqia u bë republike gati një shekull më parë.
Erdoganit do t’i dhurohej pushtet kryesisht i shtuar për të emëruar ministrat e kabinetit, për të nënshkruar dekrete, për të zgjedhur gjykatës të lartë dhe për ta shpërbërë parlamentin.
Sistemi i ri do ta largojë postin e kryeministrit dhe ta koncentrojë pushtetin në duart e presidentit, duke e vënë të gjithë burokracinë e shtetit nën kontrollin e tij.
Çka do të ketë kushtetuta e re?
Drafti i kushtetutës së re thekson se zgjedhjet e radhës parlamentare dhe presidenciale do të mbahen më 3 nëntor 2019.
Presidenti do të ketë mandat pesëvjeçar, për dy terme në maksimum.
· Presidenti do të jetë në gjendje t’i emërojë zyrtarët e lartë publikë, përfshirë ministrat
· Po ashtu, ai do të jetë në gjendje t’i emërojë një apo disa zëvendëspresidenta
· Posti i kryeministrit, që momentalisht mbahet nga Binali Yildirim, do të hiqet.
· Presidenti do të ketë pushtet të ndërhyjë në gjyqësor, të cilin Erdogani e ka akuzuar se është ndikuar nga Fethullah Gulen, predikuesi që jeton në Pensilvani, të cilin ai e akuzon për puçin e korrikut të vitit 2016 kundër tij.
· Presidenti vendos për të shpallur apo jo gjendje të jashtëzakonshme.
