Një javë pas atentatit të ndodhur në Shkozet, mbrëmjen e së enjtes ndërroi jetë shoferi i prokurorit Arjan Ndoja.
24-vjeçari Andi Maloku vdiq te Spitali i Traumës në Tiranë, për shkak të plagëve të shumta që kishte në trup, pasi u qëllua me breshëri kallashnikovi.
Ai u plagos rëndë në atentatin e 1 nëntorit, pasi plumbat e kishin kapur në shtyllën kurrizore dhe në mushkëri.
Maloku ishte sjellë në spitalin e Traumës në Tiranë, kur për 7 ditë qëndroi nën kontroll dhe terapi intensive nga mjekët.
Po kur të gjithë menduan se ishte më mirë, madje kishte një lloj shprese që t’i shpëtonte edhe paralizës, papritur gjendja e tij është përkeqësuar.
Mbrëmjen e së mërkurës, ai kishte dalë nga reanimacioni dhe ishte shtruar në pavijon. Miqtë dhe familjarët e tij po diskutonin me mjekët se sa mundësi kishte që të ecte sërish, pasi një plumb i kishte prekur shtyllën kurrizore, shkruan panorama.
“Nuk i ndjej më këmbët, ç’më bënë maskarenjtë!”, këto kanë qenë fjalët e fundit në spital të 24-vjeçarit, teksa po e dërgonin për të kryer një skaner.
Ndërkohë në profilin e tij të ‘Facebook’, të afërm dhe miq i kushtojnë fjalë zemre Andi Malokut dhe i shprehin ngushëllime familjes. Kujtojmë se më herët ai ka punuar si punonjës policie në komisariatin e Krujës.
g.kosovari
