20 Prilli shënoi zyrtarisht vënien në punë të sistemit elektronik të aplikimit për marrjen e lejeve së ndërtimit në Shqipëri. Ministria e Zhvillimit Urban, e cila mbikqyr procesin, në bashkëpunim me Agjencinë e Zhvillimit të Territorit dhe nën asistencën e ZELS, shoqatës së njësive vendore të Maqedonisë kanë nisur këto ditë trajnimin e të gjithë nëpunësve të bashkive dhe institucioneve publike që do të përdorin sistemin elektronik, si dhe projektuesit që do të paraqesin kërkesë për trajnim. Që prej 25 Prillit pjesë e trajnimit janë stafet e bashkive: Berat, Ura Vajgurore, Kuçovë, Skrapar, Poliçan, Elbasan, Cërrik, Belsh, Peqin, Gramsh, Librazhd, Korçë, Maliq , Pustec , Kolonje, Devoll, Pogradec, Durres, Shijak, Krujë, Dibër, Bulqizë, Klos, Fier, Patos, Roskovec, Lushnje, Divjakë, Mallakastër, Gjirokastër, Libohovë, Tepelenë, Memaliaj, Përmet, Këlcyrë, Dropull etj.
Nëpunësit e 61 bashkive dhe projektuesve po trajtohen nga ekspertët e ZELS. Dushica Perisiç, drejtuese e ZELS thotë se projekti i Ministrisë së Zhvillimit Urban të Shqipërisë për një portal online për leje ndërtimi do të lehtësojë procedurat për çdo qytetar apo biznes.
“Maqedonia është vendi i parë në Europë dhe i dytë në botë që ka të elektronizuar çdo shërbim për marrjen e lejeve të ndërtimit. Ne kemi kaluar nëpërmjet një procesi, i cili ka patur shumë pengesa, ndaj jemi të gatshëm të ndihmojmë çdo vend të rajonit që do të ndërtojë sistemin online për lejet e ndërtimit. Që prej Nëntorit të vitit të kaluar Ministria e Zhvillimit Urban kërkoi të bashkëpunonim, vecanërisht për të ndihmuar institucionet që përfshihen në sistemin online”, shprehet mes të tjerash Perisiç.
Sipas saj, tanimë gjithçka thjeshtohet, pasi çdo person i interesuar, në çdo cep të Shqipërisë mjafton të hyjë në sistemin elektronik në portalin e- Albania, të vendosë të dhënat dhe mund të ndjekë hap pas hapi se çfarë po ndodh me kërkesën e tij për leje ndërtimi. Pra, nuk do të ketë më nevojë të shkojë fizikisht në bashki, por mjafton të hyjë në sistem, ndërkohë që procedurat për marrjen e përgjigjes janë shkurtuar shumë, 45 ditë.
“Projekti i Ministrisë së Zhvillimit Urban është për tu vlerësuar, pasi krahas të tjerave eleminon korrupsionin në një prej procesve më të rëndësishme për zhvillimin e ndërtimit në vend, siç është ai i marrjes së lejes”, thotë Perisiç.
ZELS është shoqata e njësive vendore në Maqedoni. Që prej vitit të krijimit, 1992 në këtë shoqatë bëjnë pjesë të gjitha bashkitë në vendin fqinj dhe një prej qëllimeve të ZELS, ndër të tjera është edhe ndihma ndaj njësive vendore për forcimin e kapaciteteve, për të përmiësuar shërbimet ndaj qytetarëve.
Ekperienca maqedonase, por edhe e vendeve të tjera të Europës Juglindore për lejet elektronike do të shpaloset në konferencën e dytë ndërkombëtare, organizuar në Tiranë nga Ministria e Zhvillimit Urban në datat 5 – Maj 2016 me temë: Lejet elektronike për një rajon konkurues.
Që prej 20 Prillit deri më 30 Gusht të interesuarit mund të aplikojnë online, por edhe mund të dorëzojnë dorazi në të gjitha bashkitë në vend dokumentacionin për aplikim për leje ndërtimit. Që prej 1 Shtatorit 2016 ky proces do të kryehet vetëm online.
