Ish-kryeministri socialist, Fatos Nano, është parë një natë më parë përkrah deputetit, njëherazi ish-vartësit të tij, Taulant Balla, gjatë inaugurimit të një biznesi privat në Tiranë, ku merrte pjesë dhe kryeministri Edi Rama.
Nano ka qëndruar përkrah Ballës gjatë gjithë ceremonisë së inaugurimit. Ky afrimitet mes tyre s’ishte parë prej vitesh, madje që prej largimit të Nanos nga PS, në vitin 2009-ë, ishte aluduar edhe për një ftohje të raporteve miqësore mes tyre.
Përballë Nanos ndodhej kryeministri Edi Rama, i cili mbajti dhe një fjalim përpara të pranishmëve, ku inkurajoi investimet private në Shqipëri. Siç duket edhe nga fotet e siguruara nga Shqiptarja.com, Nano duket plotësisht i vëmendshëm gjatë fjalimit të Ramës, teksa dëgjon me vëmendje leksionin e kryeministrit. Kjo është hera e parë që Fatos Nano shfaqet në një aktivitet me kryeministrin Edi Rama.
Marrëdhëniet mes tyre kanë ardhur në përmirësim të vazhdueshëm, pas thyerjes së madhe në vitin 2005-ë, kur Rama u zgjodh në krye të PS pasi nisi një fushatë të ashpër kundër Nanos. Hapin e parë në politikë, Rama e ka bërë pikërisht gjatë qeverisë “Nano”, kur në vitin 1999-të u emëruar Ministër i Kulturës. Dy vite më pas, Nano e kandidoi Ramën për kryetar të Bashkisë së Tiranës, garë të cilën ai e fiton me lehtësi përballë demokratit Besnik Mustafaj.
Ndërsa humbja e zgjedhjeve parlamentare në vitin 2005-ë dhe përçarja e brendshme e PS-së, nisur dhe nga fraksionet që lindën në të (siç është themelimi i LSI-së) bëri që Rama të mos pajtohej me këtë frymë dhe nisi fushatën për marrjen e PS-së. Garë të cilën ai e fitoi në vjeshtë të 2005-ës, kur PS kishte kaluar në opozitë.
(Edi Rama dhe Fatos Nano gjatë inaugurimit të një biznesi privat)
