Marina është rusja që mori dje shtetësinë shqiptare. Një grua e moshuar, shumë e emocionuar për pasaportën shqiptare, duket si një ngjarje e rrallë këto kohë. Por Marina ka arsyet e veta, dhe arsyeja është nëna e saj shqiptare, një ish-balerinë e Teatrit të Operas dhe Baletit në Tiranë.
Marina Mishueva (Migunova), e lindur më 28 dhjetor 1955 në Leningrad (Shën Petersburg), është vajza e Adolf Mishuev me kombësi ruse dhe e Mellania Terca (Mishueva) me kombësi shqiptare.
Ajo është diplomuar në Fakultetin e Filologjisë të Universitetit Shtetëror të Moskës për gjuhën angleze dhe ruse. Deri në vitin 2016, ka punuar pranë këtij fakulteti si pedagoge e gjuhës angleze dhe ruse, ndërsa tani është në pension.
Marina tregon:
“Mamaja ime, znj. Mellania Terca Mishueva, ka punuar në Teatrin e Operas dhe Baletit në Tiranë si balerinë e parë, duke kontribuar me gjithë pasionin dhe talentin e saj për të përfaqësuar baletin shqiptar brenda dhe jashtë vendit deri në vitin 1961. Si balerinë e parë, ajo ka kërcyer edhe në filmin e parë shqiptar Skënderbeu.
Gjatë aktivitetit të saj si balerinë e talentuar në Tiranë, mamaja ime u martua me oficerin rus Adolf Mishuev, sigurisht me aprovimin e instancave të larta të qeverisë shqiptare, në vitin 1955.
Pas vitit 1991, Mellania Terca Mishueva ka ardhur me qëndrim afatgjatë në Tiranë te të afërmit e familjes çdo vit. Mellania është pajisur me kartë identiteti dhe pasaportë biometrike.”
E gjithë kjo histori e nënës së saj e ka nxitur Marinën të kërkojë edhe ajo shtetësinë shqiptare.
“Ëndrra ime ka qenë gjithmonë të marr shtetësinë shqiptare dhe të jem një shtetase shqiptare e denjë në këtë vend të mrekullueshëm dhe të ngrohtë, vendi i origjinës së mamasë sime. Unë flas mirë gjuhën shqipe sepse kam qenë në Tiranë deri në vitin 1961, kur për arsye të njohura politike midis dy vendeve tona, u detyruam të linim Shqipërinë.”
Marina ka aktualisht dy fëmijë të martuar. Pas dekretimit të shtetësisë shqiptare nga Presidenti i Republikës dhe kryerjes së betimit tek kryebashkiaku Z. Erion Veliaj, Marina dëshiron të jetojë në Tiranë, tek shtëpia e kushërirës së saj Alma Kora pranë Njësisë Bashkiake nr. 7.
