“Ishte një djalë si unë, dua të kërkoj falje për atë që kam bërë”. Këto janë fjalët e Igli Metës, 20-vjeçarit i cili theri me thikë në fyt Ismail Lulin, rivalin e tij në dashuri në Sant’Angelo të Vados në Pezaro.
Pendimi është shprehur gjatë marrjes në pyetje nga prokurorët, që kanë dëgjuar edhe bashkëpunëtorin në këtë krim, Mario Mema.
Ndërkohë policia italiane ka gjetur edhe armën e krimit, me të cilën Igli Meta qëlloi për vdekje Ismail Lulin: ishte në Sestino, një komunë në provincën e Arecos mes rajonit të Markes dhe Toskanës. Është gjetur edhe iPhone i Ismailit, në bregun e lumit Auro a Borgopace.
Thika është e gjatë 15 centimetra dhe së bashku me telefonin e Ismailit, janë gjetur sot në mëngjes në fund të një kërkimi të nisur që në orën 04:00, me metal-detektor, në bashkëpunim edhe me sektorë të tjerë të policisë vendase. Përveç agjentëve, ishin edhe dy shqiptarët e akuzuar për vrasjen, të cilët kanë dhënë detaje për gjetjen e armës së krimit.
Sa i takon iPhone-it, ai është gjetur në rrethinat e “La Gorga dei Morti”, ku dy vrasësit kishin shkuar të laheshin në lumë pas krimit. Aparati telefonit është cilësuar i rëndësishëm nga hetuesit, sepse mund të përmbajë mesazhe mes Ismailit dhe Metës e Memës, ose mes viktimës dhe Ambera Salijit, e dashura e Iglit, për shkak të së cilës u krye edhe vrasja nga ana e shqiptarit, xheloz për vajzën dhe i bindur se Ismaili po tentonte të lidhej me të.
Edhe pse hetimet, kanë lejuar të sqarojnë në të gjitha aspektet çështjen, mbetet për t’u kuptuar nëse krimi ka qenë i paramenduar.
