Një vajzë 28 vjeçe është ndaluar nga Policia pasi akuzohet se ka mashtruar të paktën 5 persona duke u marrë deri në 2000 mijë euro në këmbim të një vendi pune në shtet.
Ajo pretendonte se kishte njohje me drejtues institucionesh publike dhe në profilin e saj në “Facebook” kishte postuar deri edhe foto me ministra. Sipas Policisë, e arrestuara është Klodiana Kuqi, banuese në Elbasan.
28-vjeçarja është ndaluar pasi akuzohet se për një periudhë thuajse 1- vjeçare ka mashtruar qytetarë të ndryshëm duke u marrë para me pretendimin se do t’i punësonte në administratën shtetërore.
“Në finalizim të operacionit policor të koduar “Koordinatorja”, Specialistët e Sektorit për Krimin Ekonomik dhe Financiar, në Drejtorinë Vendore të Policisë Elbasan vunë në pranga 28-vjeçaren. Ndalimi i saj, u bë pasi Gjykata e Rrethit Gjyqësor Elbasan, me vendim penal më datë 14.07.2017, ka caktuar masën e sigurisë “Arrest në burg” për veprat penale “Ushtrimi i ndikimit të paligjshëm ndaj personave që ushtrojnë funksione publike” dhe “Mashtrimi”, thuhej në njoftimin e Policisë.
Prej një periudhë kohe thuajse një vit, Policia kishte nën hetim 28-vjeçaren duke marrë shkas nga denoncimet e bëra nga qytetarë të ndryshëm, të cilët pasi kanë paguar shuma të ndryshme në euro dhe nuk janë punësuar, e kanë denoncuar duke deklaruar se ajo i pohonte se kishte njohje me drejtues të ndryshëm institucionesh dhe se do t’i punë- sonte pas marrjes së parave.
Edhe pse Policia nuk identifikon asnjë nga denoncuesit, mësohet se ata janë të moshës nën 30 vjeç. Pasi nuk janë punësuar dhe kur Kuqi nuk i përgjigjej thirrjeve të tyre në telefon, ata i janë drejtuar Policisë. Zyrtarisht, Policia thotë se “kjo shtetase, dyshohet të ketë mashtruar shumë persona, pasi duke u prezantuar si koordinatore e një shoqate dhe pasi merrte kontakt me njerëz të ndryshëm dyshohet t’u ketë marrë 500 – 2000 Euro në këmbim të një vendi pune në administratën shtetërore.
Këtë aktivitet të paligjshëm, dyshohet ta ketë ushtruar në periudhën maj 2016 – mars 2017”. Pasi ka vërtetuar akuzat e marra nga denoncuesit dhe pas një hetimi 1-vjeçar, Gjykata ka dhënë masën e sigurisë arrest me burg për 28-vjeçaren.
Ndërkohë, në momentin e ndalimit nga Policia e Elbasanit, Klodiana Kuqi nuk ka pranuar akuzat e sipër përmendura duke pohuar se ndalimi i saj nuk bazohet në fakte. Nga burime pranë Policisë mësohet se, ajo u premtonte personave që ka mashtruar se do t’u siguronte një vend pune në institucione si: Instituti i Sigurimeve Shoqërore, Posta Shqiptare apo edhe Drejtoria e Tatim-Taksave.
Ndër të tjera, 28-vjeçarja i siguronte se ajo njihte drejtuesit e këtyre institucioneve publike. Kuqi në zgjedhjet lokale të vitit 2015, ishte pjesë e listës së kandidatëve për këshilltare të Bashkisë Elbasan nën siglën e Partisë Socialiste.
Në profilin e saj në rrjetet sociale, ka postuar dhe një foto me Ministren e Integrimit, Klajda Gjosha, ku pretendon se ka qenë pjesë e delegacionit të ministrisë në një vizitë zyrtare në Spanjë./Panorama/a.m.
