Roland Pula është autori i dyshuar për vrasjen e dy vëllezërve, Gramoz dhe Xhentil Bardhi, përkatësisht 34 dhe 24 vjeç, mbrëmë në Krujë. Por Pula nuk është një emër i panjohur për drejtësinë në fakt.
Ai ka qenë më parë i dënuar për disa vepra penale. Fillimisht ai është arrestuar në vitin 2008 për akuzën e kanosjes më armë, vepër për të cilën u dënua me 6 muaj burg.
Më pas në vitin 2010 sërish ai arrestohet, por këtë radhë për veprat penale “Plagosjes së lehtë me dashje” dhe “Mbajtjes pa lejë të armëve luftarake”.
Por përveç këtyre veprave të kryera në Shqipëri, për të cilat ka marrë edhe dënim, Pula dyshohet se ka kryer veprimtari të jashtligjshme edhe në disa vende të Bashkimit Europian.
Ai dyshohet se është pjesë e një grupi që merret me vjedhje dhe grabitje të shtëpive luksoze në Itali dhe në Francë.
Fillimisht autori Roland Pula dhe viktimat u konfliktuan në një lokal të fshatit, ku u përplasën verbalisht. Pas sherrit në lokal, autori shkoi për të marrë armën kallashnikov dhe u bëri pritë dy vëllezërve pranë banesës së tyre. Pas një debati të shkurtër ai qëlloi me breshëri në drejtim të tyre dhe u largua me shpejtësi nga vendi i ngjarjes.
