Bajram alias Barush Bregu 39 vjeç, është shpallur në kërkim nga Policia e Shkodrës pasi dyshohet se i ka siguruar armët e krimit Ragip Gilës. Ky i fundit paraditen e djeshme, u fut në një lokal në qendër të Shkodrës ku qëlloi me breshëri plumbash në drejtim të Erogen Vaso Alias Brajoviç, i cili mbeti i plagosur së bashku me kamarieren Meri Kaceri, ndërsa viktima mbetën Armando Pali dhe Liridon Kraja.
Barush Bregu është shpallur në kërkim së bashku me një 17-vjeçar, të cilët një banesë të braktisur në Shkodër, në lagjen “Guerrile” në pronësi të një gruaje që jeton jashtë shtetit, e kishin kthyer në magazinë armësh e municioni luftarak.
Mirëpo Bajram Bregu (Barush Bregu) nuk është emër i panjohur për policisë, mbi të gjitha ai njihet si krahu i djathë i Ibrahim Licit. Ky i fundit i njohur ndryshe si “fantazma” është armik i përbetuar i fisit Bajri apo Bajroviç.
Burime për media ditën e djeshme bënë me dije se policia gjithashtu ushtroi kontrolle në shtëpinë e motrës së Mustafa Licit, apo shtëpinë e Lulzim Kullës, dhëndër i Licve. Dyshimet janë se autori të ketë vepruar për llogari të familjes Lici apo personave të afërm të tyre.
Këto dyshime i ka mohuar Ragip Gila ditën e djeshme në dëshminë e dhënë përpara togave të zeza. Ai është shprehur se shënjestër e tij ishte vetëm Erogen Vaso alias Brajoviç, pasi ky i fundit i bënte si i fortë dhe se e kishte kërcënuar për shkak të disa mosmarrëveshjeve personale që kishin pasur së bashku.
Skeda e Bajram alias Barush Bregut
Barush Bregu është dënuar në vitin 2016 me 4 vite burgim i akuzuar për kultivim të lëndëve narkotike dhe për armëmbajtje pa leje. Në vitin 2018 gjatë një aksioni policor të zhvilluar pas vrasjes së Fatbardh Licit, në banesat e fisit Lici u gjetën armë zjarri automatike, ku në njërën prej tyre u konstatuan gjurmë gishtërinjsh të Barush Bregut.
Në mars të vitit 2019 kur në lagjen Kiras u ekzekutuan vëllezërit Ibrahim dhe Astrit Bilali, i dyshuari kryesor ishte Ibrahim Lici, ndërsa Barush Bregu akuzohej si përkrahësi kryesor i atentatorit. Ky i fundit u arresua në zonën e Komunës së Parisit në Tiranë pas një operacioni policor.
Barjam Bregu është i dyshuar për përfshirjen e tij në një sërë ngjarjesh kriminale të regjistruara në Shkodër përkrah Ibrahim Licit, i cili sot e kësaj dite vijon të jetë në arrati.
