Ashtu siç kishte paralajmëruar, ka dalë në treg romani më i ri i Ben Blushit i titulluar “Kryeministri”. Blushi bëri publik lajmin në llogarinë e tij në facebook. Më herët ai kishte premtuar se do të nxirrte dy libra, një për dritën dhe një për errësirën.
Me sa duket, për këtë të fundit duket të jetë edhe ky libër nëse kemi parasysh se Blushi është kritiku më i madh i kryeministrit Edi Rama brenda PS dhe tashmë jashtë saj. Romani tashmë është shpërndarë në çdo librari. Më herët kryeministri Rama e ka ironizuar Blushin për botimin e librave.
“Meqë ka ikur nga partia mund të thyej heshtjen por për të thënë shumë thjesht, Ben Blushi ka patur dy kryetarë në parti Fatos Nanon dhe mua. Me Fatos Nanon u bë nja tre herë ministër dhe s’bëri asnjë punë. Me mua s’bëri asnjë punë por bëri nja tre libra, romane.
Dhe e vetmja gjë që unë do t’i sugjeroja nëse do kisha mundësi do ishte që tani që është akoma me këtë mllefin atomik ndaj PS-së, të bëjë edhe një libër tjetër, një roman sepse kur të bëjë partinë e tij s’do bëjë më as punë dhe as romane. Kështu mendoj unë për Ben Blushin”, deklaronte Rama./a.m.
