Frida Kopliku është inspektorja e Drejtorisë Arsimore Rajonale në Shkodër, makina e së cilës u shpërthye me lëndë eksplozive orët e para të mëngjesit të sotëm. Ngjarja ka ndodhur në zonën e njohur ndryshe si zona e “Dollarit”, ku ndodhej i parkuar edhe mjeti i Frida Koplikut, një makinë tip “Wolkswagen” me targë AA700IY.
Nga hetimet e para mësohet se asaj i është vendosur lëndë eksplozive, tritol.
Në dëshminë e saj para policisë, Frida Kopliku ka deklaruar se nuk ka konflikt me askënd. Inspektorja është shprehur se nuk e ka idenë se kush ia ka vënë lëndën plasëse në makinë dhe se shpërthimin e ka marrë vesh nga mediat raporton Balkanweb.
Informacion paraprak nga Policia:
Më datë 11.10.2017, rreth orës 00:50, ka ardhur një telefonatë në Sallën Operative se në lagjen “Vojo Kushi” Shkodër, në rrugë është dëgjuar një shpërthim i lehtë.
Menjëhere në vendngjarje kanë shkuar shërbimet e policisë dhe shërbimi zjarrfikës ku kanë konstatur se: Si pasojë e shpërthimit kishte marrë flakë mjeti tip Volkswagen në pronësi të shtetases F. K. 60 vjeçe, banuese në lagjen “Vojo Kushi”, me detyrë Inspektore në Drejtorinë Arsimore Rajonale Shkodër. Ndërhyrja në kohë e shërbimit zjarrfikës bëri të mundur fikjen e zjarrit.
Nga veprimet e para të kryera në vendngjarje dyshohet se ka patur një shpërthim të lehtë poshtë mjetit i cili ka qënë i parkuar dhe për pasojë mjeti ka marrë flakë. Automjeti është dëmtuar lehtë në pjesën e prapme, dhe nuk ka patur dëme në njerëz. Po kryhen veprimet me grup hetimor, për sqarimin e plotë të rrethanave të ngjarjes./a.m.
