Filiali i një banke të nivelit të dytë u grabit ditën e djeshme në qendër të Durrësit, ku dy persona me maska dhe të armatosur kanë hyrë në ambientet e bankës dhe kanë arritur të marrin një sasi të konsiderueshme parash.
Të rinjtë ishin të maskuar si pleq, teksa kanë arritur të grabisin 35 mijë euro. Dy grabitësit mbanin maska plastike të gjata që mbulojnë gjithë kokën dhe jashtë ka vetëm sytë dhe ato ishin të mbuluara me syza me xham të trashë.
Pas grabitjes të rinjtë janë larguar me motorçikletë. Por ndërhyrja e shpejtë e shërbimeve dhe punonjësit të sigurisë së bankës në çastin e daljes së dy personave nga banka, çoi në arrestimin e njërit prej autorëve.
Ai është Alban Duka, 31 vjeç, me banim në Tiranë, ndërsa është identifikuar dhe po punohet për kapjen e autorit tjetër.
Ndërkohë, prania e dy mjeteve, një motoçiklete dhe një tjetër makine të shpejtë ka bërë të dyshohet se autorët po synonin që fillimisht të largoheshin me motor për të humbur gjurmët dhe më pas në zonën e plazhit ta braktisnin dhe lëviznin me automjetin që i kishin mbivendosur targat false.
