Ikea do t`i paguajë 46 milionë dollarë familjes së fëmijës që vdiq kur një komodinë e prodhuar prej gjigandit suedez të mobiljeve ra mbi të, duke i zënë frymën. 2-vjeçari Jozef Dudek, ndërroi jetë majin e 2017-tës në shtëpinë e tij në Kaliforni.
I njëjti lloj komodine me peshë 32 kilogramë, ishte tërhequr nga tregu një vit përpara për shkak të shqetësimeve mbi sigurinë e saj, që lindën pas vdekjes së tre fëmijëve të tjerë. Sipas avokatëve, kjo është marrëveshja më e madhe ligjore që arrihet në historinë e SHBA-së për vdekjen aksidentale të një të mituri.
Marrëveshja u përshëndet nga zëdhënësja e Ikea-s. “Edhe pse asnjë marrëveshje nuk i ndryshon dot ngjarjet tragjike që na kanë sjellë këtu, për hir të kësaj familjeje dhe të gjithë personave të tjerë të përfshirë, jemi mirënjohës që ky proces ligjor, mori zgjidhje”, është shprehur ajo.
Prindërit e vogëlushit, Joleen dhe Craig Dudek, thane se ishin “ të dërrmuar” nga humbja e djalit të tyre. “ Nuk e kishim menduar kurrë që një dy vjeçar mund të shkaktonte rrëzimin e një komodine 76 centimetra të lartë, e që do të mbytej poshtë saj.
“Vetëm më vonë mësuam se mobilja ishte e paqëndrueshme, dhe kjo për shkak të dizajnit të saj”, thuhej në deklaratën e tyre. Çifti shtoi se vendosi t`i shkonte deri në fund çështjes dhe e bëri atë publike, sepse nuk dëshiron që kjo fatkeqësi t`i ndodhë ndonjë familjeje tjetër. 1 milionë dollarë, Joleen dhe Craig do t`ia dhurojnë grupeve që punojnë për mbrojtjen e fëmijëve nga produktet e rrezikshme.
g.kosovari
