Një stuhi e fuqishme ka shkaktuar dëme të shumta në disa vende të Evropës, duke përfshirë Francën, Italinë dhe Zvicrën.
Erërat e forta, reshjet intensive dhe breshëri i madh kanë dëmtuar automjete, banesa dhe pemë, ndërsa situata ka krijuar momente paniku për banorët.
Në Zvicër, breshëri i madh goditi disa zona, duke dëmtuar kopshte dhe duke shkaktuar dëme të tjera materiale. Kokrrat e breshërit ishin jashtëzakonisht të mëdha, në përmasa të krahasueshme me një top tenisi, duke treguar intensitetin e rrallë të fenomenit atmosferik.
Edhe në Francë, erërat arritën shpejtësi deri në 90 milje në orë, rreth 145 kilometra në orë. Pamjet e publikuara tregojnë pemë të përkulura nga forca e erës dhe reshje të dendura që ‘godisnin’ rrugët.
Situata ishte veçanërisht e vështirë në rajonin Seine-et-Marne, ku një person u rrëzua në tokë ndërsa përpiqej të përballonte erërat e fuqishme. Në autostradën A36 pranë Besançon, një drejtues automjeti tregoi breshërin e madh që kishte depërtuar në automjet dhe kishte thyer xhamat.
Edhe në Paris, breshëri shkaktoi dëme në automjete dhe trena, duke thyer xhamat e tyre. Në një tjetër incident, një degë e madhe peme u këput nga era dhe u përplas mbi një makinë, ndërsa drejtuesi ndodhej ende brenda saj.
Stuhitë superqelizore janë sisteme të fuqishme dhe rrotulluese të stuhive, të cilat mund të zgjasin për disa orë dhe të shoqërohen me erëra shumë të forta, reshje intensive dhe breshër të përmasave të mëdha.
Autoritetet dhe banorët në zonat e prekura po përballen me pasojat e motit ekstrem, ndërsa pamjet e publikuara në rrjetet sociale tregojnë përmasat e dëmeve të shkaktuara nga stuhia.
