Ministri i Shëndetësisë, Ilir Beqaj, gjatë një takimi me mjekë, infermierë dhe punonjës të sistemit të kujdesit shëndetësor në Qarkun e Beratit, ka diskutuar për ndryshimin rrënjësor të shërbimit të urgjencës mjekësore. Sipas tij, sistemi i ri i këtij shërbimi në këtë qark, do të funksionojë në një mënyrë krejt të re, duke u organizuar për të qenë më shpejt dhe më pranë qytetarëve.
“Me planifikimin e ri për vendosjen dhe organizimin e flotës ekzistuese të autoambulancave në më shumë qendra të qarkut të Beratit, sigurohet që një autoambulancë t’u shërbejë 21 mijë banorëve, nga raporti 1 me 37 mijë që ishte më parë. Riorganizimi i Shërbimit të Urgjencës Mjekësore do të rrisë cilësinë dhe shpejtësinë e shërbimit dhe për pasojë familjarëve nuk do tu duhet më të kryejnë transportin e pacientit drejt spitalit, por do të jetë ekipi mjekësor i specializuar në këtë fushë ai që do të japë ndihmën e parë dhe do të kryejë edhe transportin e të sëmurit”, ka theksuar Ministri.
Sipas kreut të shëndetësisë, më shumë autoambulanca do të jenë në shërbim të pacientëve në këtë Qark, dhe kjo, falë investimeve që po kryhen për automjete, por edhe për shtimin e personelit të urgjencës, çka do të mundësojë edhe funksionimin me kapacitet të plotë të këtij shërbimi.
“Rishpërndarja e flotës së autoambulancave, si dhe rritja e numrit të personelit më shumë infermierë dhe shoferë, do të bëjë të mundur që çdo urgjencë mjekësore në këtë Qark malor dhe me shtrirje të gjerë, sado larg spitalit rajonal apo atyre bashkiake, të marrë shërbim më cilësor shëndetësor në një kohë më të shpejtë. Modeli i ri i reformës shumë të thellë të sistemit të urgjencës do të përqëndrojë komandën duke dekoncentruar prezencën e autoambulancave në territor, duke siguruar një mbulim jo më shumë se sa 15 minuta për ti ardhur në ndihmë qytetarëve në nevojë. Ndërkohë, duke filluar nga 1 janari i vitit 2017, i gjithë ekipi që do të shërbejë për urgjencat mjekësore në të gjithë vendin do të jetë i trajnuar për ofrimin e këtij shërbimi. Prandaj, për këtë qëllim, kemi krijuar një njësi më vete vetëm për edukimin e të gjithë këtij personeli në Qendrën Kombëtare të Urgjencës Mjekësore”, ka deklaruar Beqaj.
ma.me
