Prindërit e foshnjës dy muajshe që ndërroi jetë kanë rrëfyer versionin e tyre rreth ngjarjes së rëndë.
Foshnja e cila kishte lindur prematurë (shtatë muajsh), sipas babait kishte probleme shëndetësore, ku fillimisht ka qëndruar 1 muaj në inkubator.
Më pas ata kanë vijuar ta dërgojnë në spitale pas problemeve shëndetësore që vijonin me foshnjën.
Babi i fëmijës, Arben Veshalliu, ka treguar se kur kishte nisur të mos pinte as qumështin pluhur e kanë dërguar në spital.
“E çuam në Tiranë fëmijën se doli shtatanikë. E çuan doktorët se ishte në inkubator, ndenji 1 muaj në Tiranë dhe u kthye për të ndenjur 10 ditë në Korçë, por ne na morën në telefon na thanë hajdeni merreni fëmijën. E morëm, na dhanë ilaçet për fëmijën dhe ja jepnim.
Edhe qumësht pluhur i kam dhënë por nuk ishte fëmijë që pinte. E çova në Devoll ata më thanë çoje në Korçë, Korça pastaj e dërgoi në Tiranë, unë nuk doja se në Tiranë e çuam njëherë. Pastaj kur u kthyem në Pogradec më morën në telefon që foshnja kishte ndërruar jetë.
Fëmija kishte probleme me mushkëritë, ishte me infeksion që kur lindi. Kur e nxorëm nuk na thanë gjë që fëmija ka përsëri probleme vetëm na thanë që nxirreni nga spitali. U detyrova ta çoja në spital pasi fëmija nuk pinte qumësht, e nxirrte jashtë. Nuk kishte as temperaturë asgjë.
E kemi çuar në Tiranë unë me 2 infermiere tek Nënë Tereza, pastaj fëmija vdiq. Nuk na kanë kontaktuar më pasi fëmija ndërroi jetë. Ne s’kemi mundësi ta marrim fëmijën tonë në Tiranë, kërkojmë që të na i sjellin fëmijën këtu ta varrosim këtu.
Gruaja ime është me KEMP se është me sëmundje mendore. Edhe KEMP-in duan t’ja presin, kjo nuk është as për punë për asgjë. KEMP-i i duhet, ata edhe atë duan t’ja heqin. Jemi në vështirësi të madhe ekonomike”, tha babi i fëmijës Arben Veshalliu.
Nga ana tjetër ata bëjnë thirrje që trupi tu jepet që ta varrosin në vendlindjen e tyre, teksa nëna akuzon mjekët në Tiranë.
“Pas kësaj fatkeqësie unë kërkojë që ta sjellin fëmijën këtu që ta varros vet. Mua s’ma bën zemra që ta varros por unë dua që ta varros këtu në vendin e tij ku ka lindur, kaq dua unë nga shteti. Fajin s’e kam pasur as unë as bashkëshorti asnjë njeri.
Fajin e kanë doktorët e Tiranës jo unë se ata e nxorën para kohe, për ata duhet të marrë masa shteti.
Unë e linda me operacion dhe nuk kisha mundësi t’i jepja qumësht me gji, njëherë që vajta në Tiranë fëmija ishte në inkubator”, tha nëna e foshnjës.
“Ishte nipi i parë për familjen tonë. Ne duam vetëm ndihmë tani që ta sjellin fëmijën që ta varrosim këtu, se ne vetë nuk kemi mundësi ta sjellim. Për fëmijën përkujdesej djali im”, tha gjyshi i foshnjës që ka ndërruar jetë.
