Forumi Intelektual Mysliman Shqiptar ka reaguar pas shfaqjes së videos së djeshme, ku anëtarë shqiptarë të ISIS, kërcënonin shqiptarët. Ky forum thotë se gjatë fjalimit të tyre nuk ka asgjë njerëzore.
Forumi shprehet se ata nuk përfaqësojnë fenë islame, ndërsa ka kërkuar që gjithë imamët të ligjërojnë sot kundër kësaj gjuhe urrejtje.
“Gjatë fjalimit të tyre nuk ka asgjë njerëzore. Ata nuk i përngjasojnë dhe nuk përfaqësojnë asnjë lloj feje, pavarësisht se flasin në emër të saj. Forumi Intelektual Mysliman i bën thirrje Imamëve në të gjithë Shqipërinë dhe trevave shqipfolëse, që ligjërata e ditës së xhuma të jetë një kundërpërgjigje e ashpër kundër kësaj gjuhe urrejtje. Forumi Intelektual Mysliman, së bashku me besimtarët myslimanë dhe të gjithë shoqatat simotra do të punojmë për të nxitur vepra të mira dhe në dobi të komunitetit ku jetojmë. Që të përcjellim vlerat dhe mesazhin se islami, feja e paqes dhe e tolerancës, nuk ka të bëjë me këta njerëz, të cilët nuk njohin gjë tjetër përveçse dhunës dhe terrorit”, thuhet në deklaratën e këtij forumi.
