Forumi i gruas së PD do të zhvillojë ditën e martë në orën 12.00 një protestë përpara Kryeministrisë, kundër asaj që selia blu e vlerëson si reagim kundër dhunës dhe fjalorit denigrues të kryeministrit Rama ndaj grave. Deputetja e PD-së, Albana Vokshi, e cila lajmëroi këtë protestë bëri të ditur se ajo dhe kolegët e saj janë dëshmitarë të fjalorit të ulët të Kryeministrit. “Nuk mundet Byroja të thotë që ne nuk i kishim pamjet. Si mundet ai Kryeministër të përdorë atë fjalor? Jemi nëna. Përse fëmijët tanë të dëgjojnë këtë lloj dhune. Rama dhe Braçe nuk u dënuan, por “armiqtë e popullit”. Nuk mund të jesh me dy standard”, theksoi Vokshi. Sipas saj, të gjitha gratë demokrate ndihen të fyera nga Kryeministri. “Nuk e dhunon dot ti një grua. Në reagim të dhunës së përhershme që ushtron Rama në Parlament dhe jashtë tij, ndaj grave, nënave, në reagim të dhunës që po ushtron në jetën e përditshme, ditën e martë, ora 12:00 demokrate dhe jo demokratë, nënat dhe motrat, do të protestojmë para Kryeministrisë sepse ne nuk e durojmë dot më dhunën verbale dhe psikologjike” deklaroi Vokshi.
Forumi i gruas së PD-së: Protestë të martën te Kryeministria
