Përfaqësimi me 50 për qind i grave në listat e ardhshme zgjedhore ishte në fokus të punimeve të Forumit të Gruas Socialiste, i mbledhur të mërkurën, nën drejtimin e kryetares Olta Xhaçka, në prani dhe të përfaqësueseve të shoqërisë civile dhe te politikës në qeverisjen lokale.
Në fjalën e saj, nënkryetarja e Kuvendit, Valentina Leskaj tha se pabarazia në përfaqësim nuk është vetëm problem i grave, por i gjithë shoqërisë. Ajo u shpreh optimiste se ende ka kohë që komisioni i Reformës Zgjedhore të diskutojë nismën ligjore të dorëzuar nga deputetet gra të PS-së, muaj më parë në Kuvend.
Çështja e barazisë gjinore, tha Leskaj, nuk është vetëm luftë e grave. Nuk mund të ketë demokraci funksionale nëse gjysma e shoqërisë është e papërfaqësuar, shtoi ajo.
Për kryetaren e Forumit të Gruas Socialiste, Olta Xhaçka kjo nismë nuk duhet të shikohet si politikë, por si një betejë që u takon të gjitha grave.
Zgjedhjet e ardhshme parlamentare janë një mundësi për ta ruajtur dhe çimentuar trendin pozitiv të rritjes së pjesëmarrjes së grave në vendimmarrje.
Me parimin e “kuotës” në Kodin Zgjedhor, në legjislaturën 2009-2013, vetëm 16% e deputetëve ishin gra. Më pas, në zgjedhjet e vitit 2013 partitë politike shmangën hapur kuotat gjinore të imponuara nga ligji dhe për këtë u dënuan sëbashku në një vlerë me 22 milionë lekë nga KQZ, në shtator 2013.
Duke pranuar se në zgjedhjet e fundit vendore të vitit 2015, ku aplikimi i parimit të barazisë gjinore, ndikoi pozitivisht në pjesëmarrjen e grave në politikë, si dhe duke konsideruar deklarimet e partive kryesore në pritshmëritë e pjesëmarrjes së grave ne i propozuam për miratim Kuvendit aplikimin e kuotave gjinore në masë të barabartë, në kodin Zgjedhor.
Blerta Balilaj, nga organizata ‘Women’s Democracy Network’, në cilësinë e përfaqësueseve të grupimit të shoqatave që punojnë për fuqizimin e grave dhe vajzave në Shqipëri, lexoi deklaratën e nënshkruar prej tyre ‘Garantimi i përfaqësimit gjinor të barabartë për zgjedhjet parlamentare 2017, “mundësive të barabarta, barazi reale!”./a.m.
