Të gjithë kandidatët që kanë shlyer detyrimet e maturës shtetërore po që nuk kanë bërë plotësimin e Formularit A1Z, kanë mundësi ta bëjnë në datat 30-31 gusht 2016, pasi do të hapet portali “Matura shtetërore online”.
Ky është një shans për ata maturantë që dëshirojnë të bëhen pjesë e garës për në universitet për raundin e dytë, pra për kuotat që pritet të mbesin bosh në fazën e parë, e cila do të mbyllet në datën 5 shtator, kur të bëhet dhe shpallja e kandidatëve fitues.
“Në datat 30-31 gusht do të hapet sistemi ‘Matura Online’ për regjistrime. Ata kandidatë të cilët nuk kanë detyrime të maturës shtetërore, mund të regjistrohen në këto data, duke u paraqitur në shkollat përkatëse”, përcaktohet në njoftimin e Agjencise Kombetare te Provimeve (AKP).
Këta kandidatë duhet të kenë të dhënat në portalin e maturës, pasi në të kundërt nuk mund të bëhen pjesë e garës. Bashkarisht me këta maturantë, pjesë e garës do bëhen edhe maturantët mbetës të cilët do kalojnë me sukses provimet e vjeshtës, qe startojnë të martën, më datë 30 gusht, me provimin e gjuhës së huaj me detyrim.
Në total pritet që në sezonin e vjeshtës të hyjnë rreth 7 mijë kandidatë, të cilët mbetën në provimet e maturës në sezonin e qershorit. Pas gjuhës së huaj me detyrim, ku numri i kandidatëve mbetës është i vogël, në datën 2 shtator do të jepet provimi i Gjuhës Shqipe dhe Letërsisë, katër ditë më pas do të jetë provimi i Matematikës, pra në 6 shtator, dhe provimet e lëndëve me zgjedhje do të zhvillohen më 10 shtator. /r.a
