Bizneset që kërkojnë certifikatën e kategorizimit për hotele, bujtina, resorte, hostele, apartamente, vila dhe struktura të tjera akomoduese duhet të paraqesin dokumente më të plota për pronësinë ose përdorimin e ligjshëm të objektit.
Sipas rregullores së mëparshme, biznesi mund të paraqiste certifikatën e pronësisë ose, si alternativë, kartelën e pasurisë, certifikatën e përdorimit të objektit apo kontratën e qirasë ose përdorimit. Komisioni i Standardizimit duhej ta shqyrtonte kërkesën brenda 10 ditëve nga paraqitja në “e-Albania”.
Me ndryshimet e reja, pronari duhet të paraqesë certifikatën e pronësisë së bashku me kartelën e pasurisë. Si alternativë mund të paraqiten leja e ndërtimit dhe certifikata e përdorimit të objektit.
Kur aktiviteti ushtrohet në një pronë që nuk është në pronësi të biznesit, pranohen kontrata e qirasë, kontrata e huapërdorimit ose një marrëveshje tjetër përdorimi me pronarin. Në të gjitha rastet, dokumentet duhet të provojnë se objekti përdoret ligjërisht për ushtrimin e aktivitetit akomodues.
Një kusht i ri është edhe përputhja e adresave. Adresa e deklaruar nga biznesi në Qendrën Kombëtare të Biznesit duhet të jetë e njëjtë me adresën e hotelit, bujtinës, apartamentit apo strukturës tjetër për të cilën kërkohet kategorizimi. Bizneset që kanë mospërputhje në adresë duhet të rregullojnë të dhënat përpara përfundimit të procedurës.
Ndryshon edhe mënyra e shqyrtimit të kërkesës. Dokumentacioni do të kontrollohet fillimisht nga Sekretaria Teknike. Vetëm pasi dosja të konfirmohet e plotë, ajo do t’i kalojë Komisionit të Standardizimit të Veprimtarive Turistike.
Afati prej 10 ditësh për shqyrtimin nuk do të nisë më në momentin kur biznesi dërgon kërkesën në “e-Albania”, por nga dita kur konfirmohet se dokumentacioni është i plotë.
Nëse dosja ka mangësi, Sekretaria Teknike do ta njoftojë kërkuesin nëpërmjet “e-Albania”. Biznesi do të ketë 10 ditë pune për të plotësuar dokumentet. Koha e përdorur për plotësimin e dosjes nuk llogaritet në afatin e shqyrtimit.
Në raste të veçanta dhe të arsyetuara, Komisioni mund ta zgjasë shqyrtimin deri në 30 ditë, duke e njoftuar biznesin përmes portalit qeveritar.
Në dosje vijojnë të kërkohen planimetria përkatëse dhe fotografi aktuale të ambienteve të brendshme, të pajisura dhe funksionale, si dhe të pamjes së jashtme të strukturës.
Për kategoritë “Dhomë”, “Apartament”, “Vilë” dhe “Bllok apartamentesh” mbetet në fuqi vetëdeklarimi për kushtet e mbrojtjes nga zjarri dhe ato higjieno-sanitare, në rastet kur rregullorja e lejon këtë procedurë. Rregullat e reja kanë hyrë menjëherë në fuqi.
