Pas shpalljes një ditë më parë të situatës së emergjencës nga Prefekti i Qarkut te Kukesit, sot ka nisur Operacioni i pastrimit të Liqenit të Fierzës, operacion ku janë përfshire 18 forca dhe 3 gomone nga Reparti i Ndërhyrjes së Shpejtë i Shkodrës dhe 12 forca me 3 varka nga Forcat e Armatosura.
Operacioni i pastrimit të sipërfaqes së Liqenit të Fierzës nisi pranë urës së Drinit të Bardhë, në qytetin e Kukësit, ku është edhe zona me ndotjen më të madhe. Operacioni po mbikëqyret edhe nga Drejtori i Përgjithshëm i Emergjencave Civile, Shemsi Prençi.
Prej ditësh, sipërfaqja e Liqenit të Fierzës është tejmbushur me mbeturina, kryesisht mbeturina plastike, duke krijuar një ndotje të madhe të mjedisit fare pranë qytetit të Kukësit. Edhe gjatë viteve të kaluara, forcat e ushtrisë dhe ato të policisë kanë ndërhyrë për pastrimin e sipërfaqes së Liqenit të Fierzës nga mbeturinat, por pa mundur të gjejnë një zgjidhje të përhershme për ndotjen, shkruan VoA.
Mbeturinat që mbulojnë thuajse çdo vit Liqenin e Fierzës vijnë nga Kosova, por edhe fshatrat e Kukësit që ndodhen pranë bregut të Liqenit. Kjo situatë, sipas ekspertëve të mjedisit, është rrjedhojë e mosmenaxhimit të duhur të mbeturinave urbane, si në Kosovë ashtu edhe në territorin e Kukësit, si dhe mungesës se vend depozitimeve të përshtatshme për mbeturinat.
