Vendimi minimalist i dhënë nga Gjykata e Fierit për tre të arrestuari e operacionit “Forca e Ligjit” është interpretuar nga media si një vendim zbutës dhe një kontroll rutinë i policisë.
Por për këtë pretendim ka reaguar edhe Policia e Shtetit, e cila në një njoftim për mediat sqaron “se për këtë grup kriminal ka dy procedime penale, një në Prokurorinë e Rrethit Gjyqësor Fier dhe një në Prokurorinë e Krimeve të Rënda, ku kjo e fundit po heton për ‘Trafikim ndërkombëtar të lëndëve narkotike’ dhe ‘Falsifikim dokumentesh’”
“Në bazë të objektit të veprave penale të ndara në kapitujt e Kodit Penal, ‘Armëmbajtja pa leje’, ‘Prodhim dhe mbajtje të lëndëve narkotike’, dhe ‘Përshtatje të ambienteve për tregtim të lëndëve narkotike’, janë referuar në Prokurorinë e Rrethit Fier.
Ndërsa për grup të strukturuar kriminal mbi bazën e ligjit 1092, Antimafia, për pastrim te produkteve të veprës penale për ‘Trafikim ndërkombëtar të lëndëve narkotike’ dhe ‘Falsifikim dokumentesh’ janë referuar në datë 15.11.2017 dhe hetohen nga Prokuroria për Krimet e Rënda, Tiranë”, sqaroi policia.
Gjykata e Fierit la në ‘arrest shtëpie’ Kujtim Kuçin si person i paaftë për të qëndruar në burg, pasi është i paralizuar dhe lëviz me një karrige me rrota. Sakaq gjykata la në burg dy të arrestuarit e tjerë Dritan Tusha dhe Bashkim Ahmetaj.
Policia e Shtetit siguron se operacioni “Forca e Ligjit” do të vazhdojë edhe më me intensitet në ditët e muajt në vijim, për të goditur me ashpërsi çdo grup kriminal të përfshirë në listën e zezë të këtij operacioni, përmes bashkëpunimit intensiv me partnerët ndërkombëtarë.
a.ç
