“Fondacioni Messi”, për pastrimin e parave të drogës
Agjencia Amerikane e Anti-Drogës, DEA, po heton rreth ndeshjeve të bamirësisë të organizuara nga “Fondacioni Messi” në vendet e Amerikës Latine.
Pas çështjes së evazionit fiskal, ky është një tjetër telash për yllin e Barcelonës. Në hetimin e ndërmarrë prej muajsh nga drejtësia amerikane dyshohet se pas ndeshjeve të organizuara nga Fondacioni gjatë vitit 2013, mund të fshihet karteli meksikan i drogës.
Lajmi bëhet i ditur nga e përditshmja spanjolle “El Mundo”, që shpjegon se ndeshjet e futbollit të quajtura “Messi dhe shokët”, të luajtura në shumë vende të Amerikës së Jugut në vitet 2012 e 2013, janë nën hetim nga DEA.
Gjithçka ka nisur pas një dëshmie nga një i penduar, që ka rrëfyer se ndeshjet janë përdorur për operacione të pastrimit të parave të fituara nga droga.
Pinto, Alvesh e Masherano janë marrë në pyetje nga DEA, për të verifikuar nëse janë paguar për pjesëmarrjet e tyre në ndeshjet për bamirësi, që janë organizuar nga “Fondacioni Leo Messi”, i drejtuar nga babai i tij, Horge Messi.
