Kryedemokrati Sali Berisha nisi këtë të hënë, 4 maj, foltoren e përjavshme të PD me një minutë heshtje për dy vogëlushët, të cilët humbën tragjikisht jetën të dielën.
Gjatë fjalës së tij kreu i PD ngushëlloi familjarët dhe qytetarët e Durrësit për këtë tragjedi të madhe, teksa theksoi se pësuan një traumë nga një person, “i forti i lagjes”.
“Sonte u ftoj të nderojmë me një minutë heshtje engjëjt që qyteti i Durrësit dhe familjet i përcollën në banesën e fundit. Të ngushëllojmë familjet, të ngushëllojmë qytetin e Durrësit, për traumën e tmerrshme që pësoi nga i forti i lagjes, një kriminel i damkosur që pasi u mori jetën, i la në kthetrat e vdekjes dhe ia mbathi. I paharruar kujtimi i vogëlushëve të qytetit të Durrësit që shkuan sonte në banesën e fundit dhe i lehtë dheu i tokës mbi këta engjëj të Durrësit”, tha Berisha.
Duke u ndalur tek protesta e paralajmëruar më 8 maj, Berisha tha se nuk do të jetë aspak një protestë politike, por një “revoltë si asnjëherë më parë”. Kreu i PD tha se protesta e së premtes do të jetë një protestë kushtuar ndërgjegjes së shqiptarëve.
“Ne mblidhemi sot në këtë shesh në prag të datës 8 maj, datës së kryengritjes tonë paqësore. 8 maji është data e protestës tonë të madhe. Është data e revoltës. Por, protesta e datës 8 maj do të jetë një protestë si asnjëherë më parë. Protesta e 8 majit nuk do jetë një protestë politike. Nuk do jetë një protestë e një apo disa partive. Protesta e 8 majit nuk do jetë protestë për një kauzë. 8 maji do të jetë kushtrimi i ndërgjegjes së shqiptarëve. Do të jetë protestë për dinjitetin e shqiptarëve. Do të jetë protestë për familjen, për vogëlushët tanë, për jetën, sigurinë dhe të ardhmen e tyre. Sonte unë kam një thirrje për çdo shqiptar”, shtoi Berisha.
