Po mbarojnë kohët e lumtura të qeverisë Rama me FMN-në. Të dhënat paraprake tregojnë se të ardhurat janë me mosrealizim edhe për muajin prill. FMN-ja, përmes zyrtarit të saj, Reinke thotë se në këtë pikë është shumë e rëndësishme të kuptohet me shpejtësi cilët janë shkaqet e kësaj tendence.
Jens Reinke, përfaqësuesi i FMN-së në Tiranë, thotë se FMN-ja e priste që të ardhurat të ishin më të ulëta nga plani në muajt e parë të vitit, por jo në këto përmasa.
“Performanca e të ardhurave në buxhet ishte zhgënjyese. Ndoshta, jo e gjitha në mënyrë surprizë. Paraprakisht, ne ishim në dijeni të disa faktorëve që do të kishin efekte negative tek të ardhurat, mes tyre çmimi i ulët i naftës, i cili godet akcizën, TVSH-në dhe rentën. Gjithashtu, importi më i ulët i cigareve, por mbi të gjitha edhe inflacioni relativisht i ulët kanë ndikuar në këtë rezultat. Por, thënë këtë, këta faktorë nuk e shpjegojnë të gjithë rënien e të ardhurave, pasi ajo është më e lartë se këto efekte”, tha Reinke. Gjithsesi,
këtë të enjte, Bordi i Drejtorëve të Fondit e miratoi rishikimin periodik për marrëveshjen me Shqipërinë, duke lëvruar edhe këstin e radhës së kredisë për qeverinë.